നമുക്കൊപ്പം മാറുന്ന അടുക്കള

അടുക്കള ജെൻഡർ ന്യൂട്രൽ ആകുമ്പോൾ നമ്മുടെ അടുക്കളയിൽ എന്തൊക്കെ മാറ്റങ്ങൾ കൊണ്ടുവരണം?

കാര്യത്തിലേക്കു നേരിട്ടു കടക്കാം. നമ്മുടെ അടുക്കളകൾ മാറിയോ എന്നാണു ചോദ്യം. ഉത്തരം പറയും മുൻപു രണ്ടു രസകരമായ കാര്യങ്ങൾ കേട്ടിട്ടു വന്നാലോ?

സംഭവം 1: ഇക്കഴിഞ്ഞ മാർച്ചിൽ സ്പെയിനിലെ ഒരു കോടതിവിധി വാർത്തകളിൽ നിറഞ്ഞു. വിവാഹമോചിതയായ ഇവാന മോറൽ എന്ന വനിത 25 വർഷങ്ങൾ ശമ്പളമില്ലാതെ വീട്ടുജോലി ചെയ്തതിനുള്ള നഷ്ടപരിഹാരം എന്ന നിലയ്ക്കു മുൻഭർത്താവ് ഒന്നേമുക്കാൽ കോടി രൂപ നൽകണം. രണ്ടുമക്കളെയും ഭർത്താവിനെയും വീടുമൊക്കെ പരിചരിച്ചു ജീവിച്ച ഇവാനയ്ക്കു വിവാഹമോചനത്തിനുള്ള സെറ്റിൽമെന്റ് തുകയായാണ് 1,80,000 പൗണ്ട് (1.79 കോടി രൂപ) നൽകാൻ കോടതി വിധിച്ചത്. ഇവാന വീടു നോക്കിയപ്പോൾ കരിയറിൽ മുന്നേറിയ ഭർത്താവിനു കോടികളുടെ സ്വത്തുണ്ടാക്കാനായി എന്നതും കോടതി ചൂണ്ടിക്കാട്ടി.

സംഭവം : പാത്രം കഴുകുന്ന ലിക്വിഡിന്റെ പരസ്യം. പെണ്ണു കാണാൻ വന്ന ചെക്കനും പെണ്ണും അടുക്കളയിൽ നിന്നു സംസാരിക്കുകയാണ്. സംസാരത്തിനിടയിൽ പെൺകുട്ടിയെ 'ഇംപ്രസ് ചെയ്യാനായി പയ്യന്റെ ഡയലോഗ്, "കല്യാണം കഴിഞ്ഞാൽ ഞാൻ കുക്കിങ്ങിലൊക്കെ സഹായിക്കാം കേട്ടോ.' ഇതുകേട്ട പാടേ പെൺകുട്ടിയുടെ കലക്കൻ മറുപടി, "എങ്കിൽ പാത്രം കഴുകാൻ ഞാനും സഹായിക്കാം...

ഇനി ആദ്യ ചോദ്യം ഒരിക്കൽ കൂടി ഓർമിപ്പിക്കാം. നമ്മുടെ അടുക്കളകൾ മാറിയോ? "ഇല്ലേയില്ല' എന്നായിരുന്നു വർഷങ്ങളായുള്ള ഏവരുടെയും ഒരേ സ്വരത്തിലുള്ള മറുപടി. എന്നാൽ കോവിഡ് ലോക്ഡൗണിൽ എല്ലാവരും കൂടി വീട്ടിലിരുന്ന കാലത്തിനു ശേഷം ഈ ചോദ്യത്തിന്റെ ഉത്തരം പല തരത്തിൽ മാറാൻ തുടങ്ങി. ചിലർ 'അതെ' എന്നും മറ്റു ചിലർ "കുറേശ്ശേ ' എന്നും തുറന്നു പറയാൻ മടിക്കുന്നില്ല.

പക്ഷേ, കേരളം ഞെട്ടിയതു പഠിക്കാനായി നാടു വിട്ട മക്കൾ തിരികെ വന്നപ്പോഴാണ്. പാചകം മുതൽ പാത്രം കഴുകലും തുണിയലക്കുമെല്ലാം ആൺപെൺ ഭേദമില്ലാതെ അവർ ചെയ്യുന്നുണ്ട്.

മാറ്റത്തിന്റെ തുടക്കം