മടങ്ങുമ്പോൾ സൗമ്യ പറഞ്ഞു; ജനുവരിയിൽ വരും, നമുക്ക് വീട് വെക്കണം

ചെറുതോണി (ഇടുക്കി: ഇസ്രായേലിൽ റോക്കറ്റാക്രമണത്തിൽ കൊല്ലപ്പെട്ട ഇടുക്കി കീരിത്തോട് കാഞ്ഞിരന്താനം സന്തോഷിൻറെ ഭാര്യ സൗമ്യ (32) യാത്രയാകുന്നത് സ്വന്തമായൊരു വീടെന്ന സ്വപ്നം ബാക്കിയാക്കി.

ഏഴുവർഷം മുമ്പ് ഭർത്താവിനെയും ഏകമകനെയും തനിച്ചാക്കി ഇസ്രായേലിലേക്ക് വിമാനം കയറുമ്പോൾ സൗമ്യയുടെ സ്വപ്നമായിരുന്നു ഒരു കൊച്ചു വീട്. അവസാനമായി രണ്ടുവർഷം മുമ്പ് നാട്ടിൽ വന്നപ്പോൾ പഴയരിക്കണ്ടത്ത് 10 സെൻറ് സ്ഥലം വാങ്ങി. 2022 ജനുവരിയിൽ നാട്ടിൽ വരുമെന്നും അപ്പോൾ വീട് വെക്കാമെന്നും ഭർത്താവിനോട് പറഞ്ഞാണ് സൗമ്യ മടങ്ങിയത്.