BIG SHOT!

650 സിസി പാരലൽ ട്വിൻ സിലിണ്ടർ എൻജിനുമായി റോയൽ എൻഫീൽഡിൽനിന്നും പുതിയൊരു മോഡൽ-ഷോട്ട്ഗൺ

മോട്ടോവേഴ്സ് 2024 വേദിയിലാണ് റോയൽ എൻഫീൽഡ് ഷോട്ട്ഗണ്ണിന്റെ അവതരണം നടത്തിയത്, അതും തികച്ചും അവിചാരിതമായി. ഹിമാലയന്റെ വില പ്രഖ്യാപനം നടന്നതിന്റെ തൊട്ടടുത്ത ദിവസം ആയിരക്കണക്കിനു റോയൽ എൻഫീൽഡ് ആരാധകരെ സാക്ഷിയാക്കിക്കൊണ്ടാണ് ഷോട്ട്ഗൺ അരങ്ങിലെത്തിയത്. കസ്റ്റംമെയ്ഡ് ലിമിറ്റഡ് എഡിഷനായിരുന്നു അവതരിപ്പിച്ചത്. ആകെ 25 എണ്ണം മാത്രം. അന്ന് അവിടെ ബുക്ക് ചെയ്യുന്നവർക്ക് അതു സ്വന്തമാക്കാമായിരുന്നു. തൊട്ടുപിന്നാലെ ഇതാ സാധാരണ മോഡലും ആർഇ അവതരിപ്പിച്ചിരിക്കുകയാണ്. സൂപ്പർ മീറ്റിയോറിൽ നിന്നു പ്രചോദനമുൾക്കൊണ്ടാണ് ഡിസൈൻ, മറ്റു പുതുമകൾ, റൈഡ് കംഫർട്ട് എന്നിവയെല്ലാം എങ്ങനെയുണ്ടെന്നു വിശദമായൊന്നു നോക്കാം.

സൂപ്പർ മീറ്റിയോറും ഷോട്ട്ഗണ്ണും തമ്മിൽ

സൂപ്പർ മീറ്റിയോറിന്റെ പ്ലാറ്റ്ഫോം തന്നെയാണ് ഷോട്ട് ഗണ്ണിന്റെയും നട്ടെല്ല്. ഒറ്റനോട്ടത്തിൽ ഡിസൈനു സാമ്യമുണ്ട്. എന്നാൽ വലുപ്പത്തിലും റൈഡിങ് പൊസിഷനിലുമെല്ലാം കാര്യമായ മാറ്റം വന്നിട്ടുണ്ട് ഷോട്ട് ഗണ്ണിൽ. പിന്നിലേക്കു താഴ്ന്നിറങ്ങുന്ന അൾട്രാ ലോ ഫെൻഡർ ഡിസൈനാണ് സൂപ്പർ മീറ്റിയോറിനുള്ളത്. ബോബർ-റോഡ് സർ സ്റ്റൈലിലാണ് ഷോട്ട്ഗണ്ണിന്റെ രൂപകൽപന. സൂപ്പർ മീറ്റിയോറുമാ യി താരതമ്യം ചെയ്താൽ വീൽബേ സിൽ 35 എംഎം കുറവുണ്ട്. നീളം 90 എംഎം വീതി 70 എംഎം, ഉയരം 50 എംഎം എന്നിങ്ങനെ കുറവുണ്ട്. എന്നാൽ സീറ്റിന്റെ ഉയരം 55 എംഎം കൂടിയിട്ടുണ്ട്.