നെടും കോട്ടയായി അൽകാസർ

അത്വാഡംബര സൗകര്യങ്ങളുമായെത്തിയ അൽകാസറിന്റെ രണ്ടാംവരവ് തരംഗമാവുമോ?

കോട്ടകളുടെ സമുച്ചയം എന്നാണ് അൽ കാസർ എന്ന വാക്കിന്റെ അർഥം. സ്പാനിഷ്, അറബിക് സ്വാധീനമുള്ള പേര്. കോട്ടകളുടെ നഗരമായ ഉദയ്പൂരിൽ നെടുംകോട്ടയായി നിലകൊള്ളുന്നു ഹ്യുണ്ടേയ് അൽ കാസർ, കണ്ണെഴു തി പൊട്ടുതൊട്ട് ചന്തം ചാർത്തിയ പുത്തൻ എസ്യുവി ഇവിടുത്തെ വമ്പൻ കോട്ടകളെയും വെല്ലുന്ന ചേലിൽ ഗാംഭീര്യമായി നിലകൊള്ളുന്നു. അത്യാഡംബര കാറുകളെ പ്പോലും വെല്ലുവിളിക്കുന്ന സൗകര്യങ്ങളുമായെത്തിയ അൽകാസറിന്റെ രണ്ടാംവരവ് തരംഗമാവുമോ? ടെസ്റ്റ് ഡ്രൈവ് റിപ്പോർട്ട്..

സ്ഥലനാമ ചരിതം

സ്ഥലനാമങ്ങളിൽ അറിയപ്പെടുന്ന ആദ്യ ഹ്യുണ്ടേയ് അല്ല അൽകാസർ.വെന്യു എന്നാൽ വേദിയാണെങ്കിൽ സാന്റാഫേയും ട്യൂസോണും അമേരിക്കയിലെ സ്ഥലനാമങ്ങളാണ്. രാജ്യാന്തരവിപണികളിൽ വിവിധ പേരുകളിൽ വിളിക്കപ്പെടുന്ന വാഹനത്തെ ലളിതമായി വിശേഷിപ്പിച്ചാൽ ക്രേറ്റയുടെ നീളം കൂടിയ മോഡൽ എന്നുപറയാം. എന്നാൽ വെറും നീളക്കൂടുതലിൽ ഒതുക്കാവുന്നതല്ല അൽകാസറിന്റെ മികവുകൾ. ഗൾഫ് നാടുകളിൽ ക്രേറ്റ ഗ്രാൻഡ് എന്നും തെക്കെ അമേരിക്കയിൽ ഗ്രാൻഡ് ക്രേറ്റയെന്നുമൊക്കെ അറിയപ്പെടുന്ന നമ്മുടെ അൽ കാസർ ഹ്യുണ്ടേയ് ശ്രേണിയിലെ നവതാരമാണ്. 2021ൽ ആദ്യമായെത്തി ഇപ്പോൾ രണ്ടാം ജന്മം.

എന്താണ് അവതാരോദ്ദേശ്യം?

കാലത്തിനൊത്തുയരുകതന്നെ. അതിവേഗം മാറ്റങ്ങൾ വരുന്ന വാഹന വിപണിയിൽ പുതുമകൾ കൊണ്ട് പിടിച്ചു നിൽക്കാനാവൂ. നാലു വെന്റിലേറ്റഡ് ക്യാപ്റ്റൻ സീറ്റുകൾ മുതൽ 8 സ്പീക്കർ ബോസ് മ്യൂസിക് സിസ്റ്റം വരെയുള്ള അസംഖ്യം സൗകര്യങ്ങളും അഡാസ് ലെവൽ ടു പോലെയുള്ള സാങ്കേതികതകളും അൽ കാസറിൽ സമന്വയിക്കുന്നു. ഈ വിഭാഗത്തിൽ ആഡംബരത്തിന്റെയും സൗകര്യങ്ങളുടെയും കാര്യത്തിൽ അൽകാസറിനു വേറെ എതിരാളികളില്ല.

രൂപവതി, മൃദുലാംഗി...