ஊர்சுலா கே. லெக்வின் : அறிவியல் புனைவில் பெண்ணை விடுவித்தல்

இசை, ஓவியம், நடனம் என்பன வார்த்தைகளில் சொல்ல முடியாதவற்றை நமக்குச் சொல்கின்றன. ஆனால், இலக்கியத்தின் நுட்பம், அதை வார்த்தைகளில் சொல்லவே செய்கிறது - பெரிதும் நேரான வார்த்தைகளாலேயே." - ஊர்சுலா கே. லெக்வின் (Ursula K. Le Guin)

- சா. தேவதாஸ்

88 வயது வரை வாழ்ந்திருந்த ஊர்சுலா லெக்வின் (1929 - 2018) கவிஞர், நாவலாசிரியர், சிறுகதையாளர், குழந்தைகள் இலக்கிய கர்த்தா, மொழிபெயர்ப்பாளர் என நிறைய எழுதியிருப்பவர். பெண்ணியம், இடது அரசியல் சார்ந்து செயல்பாட்டாளராக விளங்கியிருப்பவர். அறிவியல் புனைவு வகைமையை உயரிய இலக்கிய தரத்திற்கு உயர்த்தியிருப்பவர். 'அமெரிக்க குணமற்ற அமெரிக்கர்'. 20 நாவல்கள், 12 கவிதைத்தொகுதிகள், 100 சிறுகதைகள், 13 சிறுவர் இலக்கிய நூல்கள், 7 கட்டுரைத்தொகுதிகள், 5 தொகுதிகளில் மொழியாக்கம் ஆகியவை இவரது இலக்கிய பங்களிப்பு. 9 வயதிலேயே கவிதை எழுதத்தொடங்கி, 11 வயதில் முதலாவது அறிவியல்-புனைவு கதையை வெளியிட்டவர். “The Left Hand of Darkness" (1969) என்ற இவரது புகழ் பெற்ற நாவல் 40 மொழிகளில் மொழிபெயர்க்கப்பட்டிருக்கிறது.