பிரபஞ்சக் கனவு

திருமங்கைமன்னனுக்கு 'நாலுகவிப் பெருமாள்' என்ற பெயரும் உண்டு.

- இந்திரா பார்த்தசாரதி

காரணம், அவர் எல்லாவித யாப்புவகைப் பாடல்களிலும் அவர் புகுந்து விளையாடியிருக்கிறார். நம்மாழ்வாரைச் சிறப்பித்துப் பாடிய கம்பன், திருமங்கையாழ்வார் பாடல்களாலும் பெரிதும் ஈர்க்கப்பட்டிருக்கிறான் என்று தெரிகிறது.

இன்று நாச்சியார்கோயில் என்று அழைக்கப்படும் திருநரையூரைப் பற்றித் திருமங்கைமன்னன் நூறு பாடல்கள் பாடியிருக்கிறார். அவர் காலத்தில் திருநரையூர், கண்ணுக்கினிய இயற்கைக் காட்சிகள் நிறைந்த அழகான ஊராய் இருந்திருக்கிறது.

இயற்கையையும், இறைவனையும் இணைத்துப் பாடுவது பக்திப் பாடல்களின் தனிச் சிறப்பு. ஏனெனில், அவர்கள் இயற்கையையும் இறைவனையும் வெவ்வேறாகக் கருதவில்லை.

திருமங்கையாழ்வாரின் 'பெரிய திருமொழி'யில் ஒரு பாடல்.

ஒளியா வெண்ணைய் உண்டான் என்று

உரலோடு ஆய்ச்சி ஒண் கயிற்றால்

விளியா ஆர்க்க ஆப்புண்டு

விம்மி அழுதான் - மென் மலர்மேல்

களியா வண்டுகள் உண்ண

காமர் தென்றல் அலர் தூற்ற

நளிர்வாய் முல்லை முறுவலிக்கும்

நறையூர் நின்ற நம்பியே!

திருநரையூரில் எழுந்தருளியுள்ள நம்பி, கிருஷ்ணாவதாரத்தில் குழந்தைக் கண்ணனாக ஆய்ச்சியர் வீடுகளில் கள்ளத்தனமாகப் புகுந்து வெண்ணையைத் திருடி உண்கின்றான். அவன் தாய் யசோதை அவனைக் கயிற்றால் உரலுடன் கட்டிப் போடுகிறாள். அவன் விம்மி விம்மி அழுகிறான்.