அளவுகள்

அதையே நினைச்சிக்கிட்டு இருக்க வேணாம். முதல்ல சாப்பிடுங்க'' ' சண்முகம் ஸார் சோற்றைப் பிசைந்துகொண்டே உட்கார்ந்திருந்தார்.

- கவிதைக்காரன் இளங்கோ

ஏற்கனவே உட்கொண்டிருந்த ஒரு கை உணவை வாய் சும்மா மென்றபடி இருந்தது. ஆனால் உள்ளே இறங்கவில்லை. கிருஷ்ணவேணி மேற்கொண்டு எதுவும் சொல்லவில்லை. அவரையே பார்த்தபடி இருந்தாள். அவருடைய அமைதிக்கு மதிப்பு கொடுத்து காத்திருந்தாள். இந்நொடியில் அவருக்குள்ளே எந்தமாதிரியான எண்ணவோட்டங்கள் புயல் வேகத்தில் வீசிக்கொண்டிருக்கும் என்கின்ற அனுமானம் அவளுக்கு உண்டு. அவருடைய முகம் இறுகி போயிருந்தது.

பதிமூன்று குடித்தனங்கள் உள்ள அந்த காம்பவுண்டு கட்டிடம் சில ஜன்னல் வெளிச்சப் பொட்டுகள் போக கணிசமான இருட்டை போர்த்தியிருந்தது. கீழ்த்தளம், முதல் தளம், மொட்டை மாடி என இரண்டு அடுக்குகளில் முட்டைவடிவ சுற்றிலிருந்த அந்த பிரம்மாண்டமான கட்டிடத்தில் இரண்டு தளங்களிலும் பகுதி பகுதியாக அடுத்தடுத்து வீடுகள் அமைந்திருந்தன. கீழ்த்தளத்தில் பொதுபுழக்கத்திற்கென அகன்று விரிந்திருந்த இடத்தின் வலதுபக்க ஓரத்திலிருந்து உயரும் படிக்கட்டுகள் முதல் தளத்திற்கும் அடுத்ததாக அங்கிருந்து மொட்டைமாடிக்குமாக மேலும் உயர்ந்தெழுந்து மடிந்தபடி பார்வையிலிருந்து மறைந்திருந்தது.

ஒவ்வொரு குடும்பமும் மறுதினத்தின் புதிய அன்றாடத்திற்கு தயாராவதன் பொருட்டு அவ்விரவில் ஓய்ந்துபோயிருந்தது.