టాయీ స్పెషల్ గిఫ్ట్

అమ్మమ్మకు ప్రత్యేక బహుమతిగా ఏమి కొనాలో తేల్చుకోలేకపోతోంది టాయి.

- కథ • సువదిప్ భట్టాచార్జీ

అమ్మమ్మకు ప్రత్యేక బహుమతిగా ఏమి కొనాలో తేల్చుకోలేకపోతోంది టాయి. మెరిసే లైట్లతో, వివిధ షేడ్స్తో వేలాడే దీపాలతో, చిన్న పిల్లలు వారి తల్లిదండ్రులతో షాపింగ్ మాల్స్ సందడిగా మారాయి. షోకేసులన్నీ ఆకర్షణీయమైన గిఫ్టులతో నిండి ఉన్నాయి. రకరకాల సాఫ్ట్ టాయ్స్, బ్యాగ్స్, బుక్స్, చక్కని దుస్తులు, క్యాప్స్, స్వెట్టర్లు, ట్రౌసర్లు, మగ్లు ఇంకా ఎన్నో ఇతర వస్తువులు అక్కడ ఉన్నాయి. గిఫ్ట్ షాప్స్ దగ్గర జనం రద్దీ బాగా ఉంది. కానీ అక్కడ అమ్మమ్మకు ఇచ్చేంత స్థాయిలో గిఫ్ట్లు లేవు.

టాయీ తల్లిదండ్రులతో టొరొంటో నగరంలో నివసిస్తోంది. ఈ ప్రదేశం తన అమ్మమ్మ నివసిస్తున్న పాట్నా నగరానికి ఎంతో దూరంలో ఉంది. వాళ్లింటి చుట్టూ మామిడి చెట్లున్నాయి. టాయీ రెండు సంవత్సరాల కొకసారి అమ్మమ్మను చూడడానికి వెళ్లేది. ఆమెకు టాయీకి గాఢమైన అనుబంధం ఉండేది. ఆమెకు తనకున్న అనుబంధాన్ని గురించి టాయీ తన స్నేహితురాళ్లతో “మా అమ్మమ్మ నా బెస్ట్ ఫ్రెండ్. నేను చెప్పే ప్రతి మాట వింటుంది. మా తల్లిదండ్రులు సైతం ఇలా వినరు" అని చెప్పేది.

ఆమె స్నేహితుల్లో ఒకరైన నీలికళ్ల అమ్మాయి లిసా “నువ్వు ఆమెను ఎంతో ప్రేమిస్తున్నట్లు అనిపిస్తోంది. మహిళా దినోత్సవం రోజున ఆమెకు ఒక మంచి బహుమతి ఇవ్వవచ్చు కదా?” అని అడిగింది టాయీని. అది ఆమెను ఆలోచింప చేసింది. అమ్మమ్మ కోసం ఒక స్పెషల్ గిఫ్ట్ కొని ఎయిర్మెయిల్లో ఆమెకు పంపించాలనుకుంది.

ఆదివారం రోజు ఆమె గ్లాసీ స్ట్రీట్ అనే గిఫ్ట్ మార్ట్కి వెళ్లింది. ఆమెతోపాటు ఆమె తల్లి గిఫ్ట్లను చూడడానికి వచ్చింది. కానీ టాయీ ఏదీ ఎంచుకోలేకపోయింది.

ఆమెతో ఉన్న తండ్రి అసహనానికి లోనయ్యాడు.“అమ్మమ్మకి గిఫ్ట్ కొనడానికి ఇంత ఆలస్యం దేనికీ? నువ్విలా ఏదీ నచ్చకపోతే మనం ఇంటికి వెళ్లడం ఆలస్యమవుతుంది" అన్నాడు.

“సారీ నాన్నా, నాకు ఏదీ స్పెషల్గా అనిపించడం లేదు” జవాబు ఇచ్చింది టాయీ నిరుత్సాహంగా.