சென்னையில் இருக்கு காலண்டர் ஓவியர்களின் கலைக்கூடம்!

காலண்டர் ஓவியங்களின் பிதாமகர் ஓவியர் கொண்டையராஜு. அவரின் சீடர்கள் வரைந்த கடவுள் ஓவியங்கள்தான் அன்று காலண்டர்களை அலங்கரித்தன.

- பேராச்சி கண்ணன்

இந்த கடவுள் ஓவியங்களுக்காகவே அன்றைய வீடுகளில் காலண்டர்கள் வாங்கும் பழக்கமும் இருந்து வந்தது. ஆனால், நவீன டிஜிட்டல் யுகத்தில் அவையெல்லாம் காணாமல் போய்விட்டன.

தூத்துக்குடி மாவட்டம் கோவில்பட்டியில் காலண்டர் ஓவியத்துக்கென தனித்துவமான பாணியை உருவாக்கி, இந்திய கலைஞர்களைத் திரும்பிப் பார்க்கச் செய்த ஓவியர்கள் இவர்கள்.

அதுமட்டுமல்ல. வட்டார தெய்வங்களைக் காலண்டர் ஓவியங்களாக ஆக்கிய பெருமைக்குரிய ஓவியர்களும் இவர்கள்தான். இவர்களின் ஓவியங்கள் எப்படி இருக்கும் என்பது அன்றைய தென்மாவட்ட மக்களுக்கே தெரியும்.

இப்போது இந்த ஓவியங்களை மீட்டெடுத்து அதை நிரந்தர ஆர்ட் கேலரியாக சென்னையில் காட்சிக்கு வைத்திருக்கிறார் ஜெயக்குமார்.

இவர், அன்று காலண்டர் ஓவியங்களில் ஜொலித்தவரும், ஓவியர் கொண்டையராஜுவின் பிரதான சீடர்களில் ஒருவருமான மு.ராமலிங்கத்தின் இளைய மகன். சென்னை ஆழ்வார்திருநகரில் ‘சித்ராலயம்’ என்ற பெயரில் இவர் திறந்திருக்கும் ஆர்ட் கேலரியில் சந்தித்தோம்.

‘‘2012ம் ஆண்டு பாண்டிச்சேரியில் பிரபல கலைஞர் சிற்பி ஜெயராமன், ‘சினிமா நூறு’னு ஒரு ஆர்ட் ஷோ பண்ணியிருந்தார். சினிமா சம்பந்தமாக நூறு போர்ட்ரைட்ஸ் வரைஞ்சு பார்வைக்கு வச்சிருந்தார். அதுக்கு நான் போயிருந்தேன். அங்க நடந்த வொர்க் ஷாப்ல கலந்துக்கிட்டேன்.

அப்பதான் நாமும் அப்பாவின் ஓவியங்களை ஷோவுக்கு வைக்கலாமேனு தோணுச்சு. ஏன்னா, காலண்டர் ஓவியங்கள், குறிப்பாக அன்றைக்கு மக்களால் நேசிக்கப்பட்ட கடவுள் ஓவியங்களை வைக்க ஒரு கலைக்கூடம் இங்கில்ல. அதை நாம் செய்வோம்னு நினைச்சேன்.

அப்படியாக ஆரம்பிச்ச கனவுப் பயணம், இப்ப பத்தாண்டுகளுக்குப் பிறகு நனவாகியிருக்கு...’’ என்றவர், இந்த ஓவியங்களைச் சேகரிக்க நிறைய அலைந்திருக்கிறார்.  ‘

‘இதை சேகரிக்கணும்னு நினைச்சதும் என் அண்ணன் சோமுகிட்ட, ‘இப்ப படங்கள் எதுவும் இல்லை. எல்லாமே வித்துட்டாங்க. என்ன செய்ய’னு கேட்டேன். அப்ப அண்ணன் சோமுதான், ‘அப்பா வரைஞ்ச பிரஸ்கள்ல போய் கேட்டால் கிடைக்கும்’னு நம்பிக்கையாகச் சொன்னார்.