தீபாவளி டபுள் X விருந்து!

‘ஜிகர்தண்டா’... இந்த வார்த்தையைக் கேட்டாலே தமிழ் சினிமா மட்டுமல்ல இந்திய சினிமா உலகமே கண்கள் விரியப் பார்ப்பார்கள். அந்த அளவிற்கு பெஞ்ச் மார்க் உருவாக்கியது மட்டுமல்லாமல் ஸ்டோன்பென்ச் என்னும் நிறுவனத்தையும் உருவாக்கி, தேசிய விருது முதல் இந்திய மொழிகள் பலவற்றிலும் ரீமேக் செய்யும் அளவுக்கு பெரும் வரலாறு உருவாக்கிய படம் இது.

- ஷாலினி நியூட்டன்

இதோ இப்போது ‘ஜிகர்தண்டா டபுள் X’ கார்த்திக் சுப்புராஜ் இயக்கத்தில் ராகவா லாரன்ஸ் மற்றும் எஸ்.ஜே.சூர்யா நடிப்பில் பிரம்மாண்ட பீரியாடிக் படமாக உருவாகி தீபாவளி சிறப்பாக வெளியீட்டிற்குக் காத்திருக்கிறது.  

‘‘என்னை ஒரு நடிகனாக நானே பார்த்திராத கோணத்தில் பார்த்தவர் கார்த்திக் சுப்புராஜ்...’’ பல நினைவுகள் ஒருசேர ஆரம்பித்தார் எஸ்.ஜே.சூர்யா.

 ‘ஜிகர்தண்டா டபுள் X’..?

இந்தப் பெயருக்கு ஒரே கதைதான்! சினிமா படமெடுக்கத் துடிக்கும் ஓர் இயக்குநர், அவர் ரிஸ்க் எடுத்து ஒரு படம் எடுக்க வேண்டிய சூழலில் எப்படி தன்னையே பணயம் வைக்கிறார் என்பதுதான் பொதுக்கதை.

இந்த ‘ஜிகர்தண்டா டபுள் X’ கதைல அந்த இயக்குநர் நான்தான். இயக்குநர் மட்டுமல்ல... நான் பழம்பெரும் இயக்குநர் சத்யஜித்ரே சாருடைய அஸிஸ்டெண்ட். ஒரு ரியலிஸ்டிக் படமெடுக்கறதுக்காக, கொடூரமான ரவுடியிடம் மாட்டிக்கறேன். அதன்பிறகு என்ன நடக்குதுங்கறதுதான் கதை. அந்தப் படத்திலே சித்தார்த் ஹீரோ, பாபி சிம்ஹா வில்லன் என நடிச்சிருப்பாங்க. இந்தக் கதையில் நானும் லாரன்ஸ் மாஸ்டரும் ஹீரோக்கள்தான். ரெண்டு பேருமே வில்லன்கள்தான். அதாவது ரெண்டு பேருக்குள்ளும் இருக்கும் கிரே ஷேட் ஒவ்வொரு கட்டத்திலே வெளிப்படும்.

உங்க கேரக்டர் பத்தி சொல்லுங்க..?

ஓர் இயக்குநரே இயக்குநரா நடிச்சிருக்கறதால, எனக்கு சில விஷயங்கள் ரொம்ப சுலபமாக இருந்துச்சு. குறிப்பா கேமரா பிடிக்கும் விதம், கையாளும் விதம் எல்லாமே திரையிலே பார்க்கும்போது உங்களுக்கே அந்த ரியாலிட்டி புரியும். நிச்சயமா வேறு ஒரு மொழியிலோ, அல்லது நாட்டிலோ என்னுடைய கேரக்டரைப் பார்க்கும் போது அதிலே தப்பு கண்டுபிடிக்கவே முடியாது. எனக்கு மனசுக்கு நெருக்கமா இருந்துச்சு. நான் கேமரா பிடிச்சிருக்கறதை இன்னொரு கேமரா கேப்ச்சர் செய்கிற மொமெண்ட்... இப்ப நினைச்சாலும் எமோஷனலாகிடுவேன்.