படித்தது இங்கிலாந்தில்...கற்றது இஸ்ரேலில்...செய்வது இந்தியாவில் விவசாயம்!

சுமார் 10 ஆயிரம் வருடங்களுக்கு முன் மெக்சிகோவில் அவகாடோ விவசாயம் செய்யப்பட்டதாக வரலாற்று ஆய்வுகள் சொல்கின்றன. தென் அமெரிக்க நாடுகளிலும், இஸ்ரேல் போன்ற ஆசிய நாடுகளிலும் விளையும் ஒரு பழமாக இருந்து வந்தது அவகாடோ. இருபதாம் நூற்றாண்டின் ஆரம்ப வருடங்களில் இந்தியாவிலும் அவகாடோ விளையத் தொடங்கியது. சமீப வருடங்களாக இந்தியாவில் அவகாடோ விவசாயம் செழிக்க ஆரம்பித்துள்ளது.

- த.சக்திவேல்

இதற்குக் காரணம், சில விவசாயிகள். இந்த விவசாயிகளில் முக்கியமான ஒருவர், ஹர்ஷித் கோதா என்ற இளைஞர். இஸ்ரேலில் விளையும் அவகாடோ வகைகளை இந்தியாவில் விளைவித்து வருகிறார் இந்த இளம் விவசாயி.

மத்தியப்பிரதேசத்தின் தலைநகரான போபாலில் வசித்து வரும் ஒரு வசதியான குடும்பத்தில் பிறந்தவர் ஹர்ஷித் கோதா. ஆறு வருடங்களுக்கு முன்பு இங்கிலாந்தில் உள்ள பாத் பல்கலைக்கழகத்தில் பிபிஏ படித்து வந்தார் ஹர்ஷித். உடலை ஃபிட்னஸாக வைத்துக்கொள்வதில் தீவிர ஆர்வமுடையவர். அதனால் முறையாக உணவுக் கட்டுப்பாட்டைக் கடைப்பிடித்து வந்தார்.

தினமும் அவகாடோ சாப்பிடுவது அவரது உணவுக் கட்டுப்பாட்டு பட்டியலில் முக்கியமானது. கோடை விடுமுறையில் போபாலுக்கு வரும்போதும் இதே உணவுக் கட்டுப்பாட்டைத் தொடர்ந்தார். போபாலில் கிடைத்த அவகாடோவின் தரம் குறைவாக இருந்தது. இங்கிலாந்தில் கிடைக்கின்ற அவகாடோவைப் போல தரமான ஒன்றைத் தேடி அலைந்தார். எங்கேயும் அவருக்குக் கிடைக்கவில்லை.

விடுமுறை முடிந்து இங்கிலாந்துக்குத் திரும்பிய ஹர்ஷித் முதல் வேலையாக அவகாடோவைப் பற்றிய ஆய்வில் இறங்கினார். இங்கிலாந்தில் கிடைக்கும் தரமான அவகாடோவுக்கு மூல காரணம் இஸ்ரேல் என்பது அவருக்குத் தெரிய வந்தது. ஆம்; இஸ்ரேலில் விளைந்து, இங்கிலாந்தில் விற்பனை செய்யப்பட்ட அவகாடோவைத்தான் ஹர்ஷித் ருசித்து வந்தார். இஸ்ரேலின் வெப்பத்துக்கே அவகாடோ விளைகின்றது என்றால் இந்தியாவில் விளையாதா என்ற எண்ணம் ஹர்ஷித்துக்குள் தோன்றியது.