ராஜா சார் இசையமைக்க சம்மதிச்சார்...ஆனா, அவருக்கு சம்பளம் தர எங்ககிட்ட பணமில்ல...

‘‘இசைஞானி ஐயா இந்த படத்தில் இணைந்த பிறகு தான் படம் அடுத்த கட்டத்திற்கு நகர்ந்தது. ராஜா சாரை சந்தித்தது... அவர் படத்திற்கு இசையமைக்க ஒப்புக்கொண்டது... என அனைத்தும் இப்போது நினைத்தாலும் கனவு மாதிரி இருக்கு...’’ நெகிழ்கிறார் ‘வட்டார வழக்கு’ திரைப்படத்தின் மூலம் அறிமுகமாகும் இயக்குநர் ராமச்சந்திரன்.

- ஷோலினி நியூட்டன்‌

எதனால் இந்தத் தலைப்பு?

எல்லோரும் மதுரைத் தமிழ் என தனியாகப் பிரிப்பார்கள். ஆனால், மதுரையிலேயே கூட ஒவ்வொரு வட்டாரத்துக்கும் ஒருவிதமான பேச்சு வழக்கு இருக்கும். அப்படியான ‘வட்டார வழக்கு’ தமிழ் மொழியையும் இந்தத் தலைப்பு குறிக்கும்.  அதே சமயம் ரெண்டு குடும்பங்களுக்கு இடையில் ஒரு கொலை நடக்கும்... அது சார்ந்த வழக்கும் படம் முழுக்க பயணிக்கும். ஒரு வட்டாரத்தில் நடக்கும் வழக்கையும் குறிக்கிறதால ‘வட்டார வழக்கு’ என்கிற தலைப்பு ரொம்ப பொருத்தமா இருந்துச்சு.