நாசியின் விளையாட்டுத் திடல்!

பொதுவாக வாசனைத் திரவியங்கள் தயாரிக்கும் நிறுவனங்கள் வாசனைத் திரவியங்களுக்கு எவ்வளவு முக்கியத்துவம் கொடுக்கிறதோ, அதே அளவுக்கு அந்த வாசனைத் திரவியங்களைப் பாதுகாப்பாக வைத்திருக்கும் குடுவைக்கும் முக்கியத்துவம் கொடுக்கிறது.

அதனால்தான் வாசனைத் திரவியங்களின் குடுவைகள் விதவிதமான வடிவங்களில், வாடிக்கையாளர்களைக் கவரும் விதமாக இருக்கும். குடுவைக்காகவே பெரிய முதலீட்டைச் செய்திருப்பார்கள். மட்டுமல்ல, குடுவைக்காகவே வாசனைத் திரவியங்களை வாங்குபவர்கள் கூட இருக்கின்றனர். குடுவை வடிவமைப்பிற்குப் பிறகு வாசனைத் திரவிய நிறுவனங்கள் அதிகமாக கவனம் செலுத்துவது, விளம்பரம்தான்.

நறுமணத்துக்குப் பிறகு விளம்பரமும், குடுவைகளின் அழகும்தான் வாசனைத் திரவியங்களின் விற்பனைக்கு முக்கிய காரணங்கள். இந்நிலையில் விளம்பரமும் இல்லாமல், குடுவைக்கும் முக்கியத்துவம் தராமல் முழுக்க முழுக்க வாசனைத் திரவியத்தை மட்டுமே நம்பி, விற்பனையில் பட்டையைக் கிளப்பிக்கொண்டிருக்கும் ஒரு பிராண்ட், ‘லே லெபோ’. ஃபிரான்ஸில் அமைந்துள்ள ஓர் இடம், கிராஸ். உலக வாசனைத் திரவியங்களின் தலைநகரம் என்று புகழப்படுகிற கிராஸில் உருவாகி, நியூயார்க்கில் வளர்ச்சியடைந்த ஒரு பிராண்ட், இது.

இந்த பிராண்டின் வாசனைத் திரவியங்கள் சாதாரணமான, ஒரே மாதிரி இருக்கும் குடுவையில்தான் கிடைக்கும்; விளம்பரமும் கிடையாது. ஆனால், ‘லே லெபோ’வின் வாசனைத் திரவியம் உலகின் முன்னணி பிராண்டுகளுடன் சவால் விடுபவை. அதனால் ‘லே லெபோ’வை புரட்சி பிராண்ட் என்று அழைக்கின்றனர்.

சுவிட்சர்லாந்தில் உள்ள லுகானோ எனும் நகரத்தில் பிறந்தவர், எடி ரோச்சி. இத்தாலியர்கள் அதிகமாக வாழும் பகுதி இது. கெமிக்கல் எஞ்சினியரிங் படித்த எடிக்கு, கெமிக்கல் துறை சார்ந்த வேலைக்குச் செல்ல விருப்பமில்லை. அதனால் தனக்கு விருப்பமான வேலையைத் தேடி நாடு, நாடாக அலைந்தார். 

அவருக்குப் பிடித்த வேலை கிடைக்கவே இல்லை. 1999ல் பாரிஸுக்கு வந்தார். வேலை தேடுவதை விட்டுவிட்டு, அங்கே எம்பிஏ படித்தார். பிறகு ஃபிரான்ஸில் கோலோச்சிக் கொண்டிருந்த ஆடம்பர பிராண்டுகளான ‘லோரியல்’, ‘அர்மானி’யில் வேலை செய்தார். குறிப்பாக ‘லோரியலி’ல் வேலை செய்யும்போதுதான் ஃபேப்ரைஸ் பீனோட்டைச் சந்தித்தார் எடி.