அமெரிக்காவில் கிரிக்கெட்!

அமெரிக்காவின் கலாசாரத்தில் முக்கியமான இடத்தை விளையாட்டுகள் பிடித்திருக்கின்றன. இதற்கு சாட்சியாக இருக்கிறது பேஸ்பால்.

- த.சக்திவேல்

இந்த விளையாட்டை அறியாத ஒரு அமெரிக்கர் கூட இருக்க மாட்டார். அமெரிக்காவின் தேசிய விளையாட்டும் இதுவே. 

தவிர, கடந்த ஐம்பது வருடங்களாக அமெரிக்கர்களின் மத்தியில் அமெரிக்கன் ஃபுட்பாலும் பிரபலமாகி வருகிறது. அத்துடன் அமெரிக்கன் ஃபுட்பால் போட்டிகளைத் தொலைக்காட்சியில் பார்ப்பவர்களின் எண்ணிக்கையும் அதிகரித்துவிட்டது.

பேஸ்பால், அமெரிக்கன் ஃபுட்பாலுக்கு அடுத்து அமெரிக்கர்கள் விரும்பும் ஒரு விளையாட்டாக இருக்கிறது, கூடைப்பந்து.

1980களிலிருந்து அமெரிக்காவில் கூடைப்பந்து விளையாட்டு ஏறுமுகத்தில் உள்ளது. 21ம் நூற்றாண்டில்தான் அமெரிக்காவின் முக்கிய விளையாட்டுகளின் பட்டியலில் ஐஸ் ஹாக்கியும், கால்பந்தும் இடம்பிடித்தன. 

பேஸ்பால், அமெரிக்கன் ஃபுட்பால், கூடைப்பந்து, ஐஸ் ஹாக்கி, கால்பந்து ஆகியவற்றை அமெரிக்காவின் மிகப்பெரிய ஐந்து விளையாட்டுகள் என்கின்றனர்.

இருபதாம் நூற்றாண்டின் முதல் பாதியில் பேஸ்பாலுக்கு அடுத்து குத்துச்சண்டைதான் அமெரிக்காவில் பிரபலமாக இருந்தது. மட்டுமல்ல, கோல்ஃப், டென்னிஸ் போன்ற விளையாட்டுகளுக்கும் அமெரிக்காவில் கணிசமான ரசிகர்கள் இருக்கின்றனர்.

இன்று அமெரிக்காவில் மிகப்பிரபலமான விளையாட்டுகளின் பட்டியலில் டென்னிஸுக்கு ஆறாம் இடம் கிடைத்துள்ளது. சமீபத்தில் தற்காப்புக்கலை சார்ந்த விளையாட்டுகளுக்கும் அமெரிக்காவில் மவுசு கூடியிருக்கிறது.

தவிர, வாட்டர் ஸ்கீயிங், விண்ட் - சர்ஃபிங், ஸ்கேட்போர்டிங், ஸ்னோபோர்டிங், பீச் வாலிபால் போன்ற விளையாட்டுகளை உலகுக்கு அறிமுகப்படுத்தியதே அமெரிக்காதான்.

இதுபோக அமெரிக்காவின் புரொஃபஷனல் விளையாட்டுகளின் சந்தை மதிப்பு சுமார் 5.76 லட்சம் கோடி ரூபாய். இது ஐரோப்பா, மத்திய கிழக்கு நாடுகள், ஆப்பிரிக்காவை ஒன்று சேர்த்தால் கிடைக்கும் சந்தை மதிப்பை விட 50 சதவீதம் அதிகம்.

விஷயம் இதுவல்ல; சமீபத்தில் அமெரிக்காவுக்குள் அடியெடுத்து வைத்திருக்கிறது, கிரிக்கெட். ஆனால், 300 வருடங்களுக்கு முன்பே அமெரிக்காவில் கிரிக்கெட் விளையாடப் பட்டிருப்பதாக வரலாறு சொல்கிறது.

பதினெட்டாம் நூற்றாண்டின் ஆரம்ப வருடங்கள். ஆங்கிலேயர்களின் காலனி ஆதிக்கத்துக்குள் இருந்தது வட அமெரிக்கா. அப்போது ஆங்கிலேயர்கள் மூலமாக வட அமெரிக்கர்களுக்குக் கிரிக்கெட் விளையாட்டு அறிமுகமானது.