தாராவி மறுசீரமைப்புத் திட்டம்...ஆதாயத்தில் அதானி குழுமம்... கலக்கத்தில் மக்கள்...

சமீபத்தில் நடந்து முடிந்த மகாராஷ்டிரா தேர்தலில் ஆளும் பாஜக தலைமையிலான 'மகாயுதி' கூட்டணி மாபெரும் வெற்றியை ஈட்டியது.

- பேராச்சி கண்ணன்

இந்த வெற்றி அதானி குழுமத்திற்கு சாதகமான சூழலை ஏற்படுத்தியுள்ளது.

காரணம், கவுதம் அதானி குழுமம் சுமார் 3 பில்லியன் டாலர் மதிப்பில் மும்பையின் இதயப் பகுதியாக விளங்கும் தாராவியை மறுவடிவமைக்கும் பணியை கையில் எடுத்திருப்பதுதான்.

எதிர்க்கட்சியான உத்தவ் தாக்கரே, சிவசேனா தலைமையிலான 'மகா விகாஸ் அகாடி' கூட்டணி இதை எதிர்த்து வருகிறது. தாங்கள் ஆட்சிக்கு வந்தால் ஆசியாவின் மிகப்பெரிய சேரியை அதானி குழு மத்திடமிருந்து மீட்பதாகவும், இந்தத் திட்டம் முழுவதையும் கைவிடுவதாகவும் உறுதியளித்தது.

ஆனால், தேர்தலில் பாஜக வெல்ல அதானி குழுமம் உற்சாகமாகி இருக்கிறது.

தாராவி

மும்பையின் இதயப்பகுதியில் ஒன்றாக தாராவி. உலகின் மிகப்பெரிய சேரிப் பகுதியும் கூட. இங்கு சுமார் 7 முதல் 10 லட்சம் மக்கள் வரை வசிப்பதாகச் சொல்லப்படுகிறது. இதனால், உலகின் அதிக மக்கள்தொகை கொண்ட சேரிப் பகுதியாகவும் உள்ளது.

சுமார் 600 ஏக்கர் நிலப்பரப்பு கொண்டது இந்தப் பகுதி. 19ம் நூற்றாண்டின் நிறைவில் பிரிடிஷ் காலத்தில் தாராவி உருவானது. அப்போது மகாராஷ்டிராவின் மற்ற பகுதிகளில் இருந்து மும்பைக்கு வேலை நிமித்தமாக பலர் குடியேறினர்.

தொடர்ந்து குஜராத்திகள், தமிழர்கள், தெலுங்கர்கள் எனப் பலதரப்பட்ட மக்களும் அங்கு வேலைக்காக வந்தனர். தற்போது இங்கே வசிப்பவர்களில் 50 சதவீதம் பேர் தமிழர்கள் எனச் சொல்லப்படுகிறது.

இங்கு வசிப்பவர்கள் தோல் பதனிடுதல், அதிலிருந்து பெல்ட், பர்ஸ் உள்ளிட்ட பொருட்கள் செய்தல், டெக்ஸ்டைல் மற்றும் டெய்லரிங் பணியில் ஈடுபடுதல், உணவு உற்பத்தி தொழில் செய்தல், கழிவுப் பொருட்களை ரீசைக்கிள் பண்ணுதல், மட்பாண்டங்கள் செய்தல் உள்ளிட்ட பல்வேறு தொழில்களில் ஈடுபட்டு வருகின்றனர்.

சேரிப் பகுதியாக விளங்கும் இதை மறுசீரமைப்பு செய்ய கடந்த இருபது ஆண்டுகளாக பேசி வருகிறது மகாராஷ்டிரா அரசு. அதுவே இப்போது வேகம் கண்டுள்ளது. இந்நிலையில் தங்களுக்குத் வீடு ஒதுக்கப்படுமா என தாராவி மக்கள் பலர் கலக்கத்தில் உள்ளனர்.

தாராவி மறுசீரமைப்புத் திட்டம்