ഷക്കീല ജീവിതം ആസ്വദിക്കുകയാണ്

ഒരു കാലത്ത് യുവാക്കളുടെ മാദക സുന്ദരിയായി ശ്രദ്ധ നേടിയ നായികയാണ് ഷക്കീല. അഡൾട്ട് ഒൺലി ചിത്രങ്ങളിൽ മാത്രം അഭിനയിച്ചിരുന്ന നടി എന്ന ഇമേജ് ഷക്കീലയിൽ നിന്നും മാറിവരുന്ന കാഴ്ചയാണ് സിനിമാപ്രേമികൾ ഇന്ന് കണ്ടുകൊണ്ടിരിക്കുന്നത്. ഭിന്നലിംഗക്കാരുടെ വളർത്തമ്മയായി നിലപാടുകൾ  ധൈര്യമായി ഉറക്കെ വിളിച്ചുപറയുന്ന ഏവരുടേയും പ്രിയപ്പെട്ട കലാകാരിയാവാൻ ഷക്കീലയക്ക് ഇന്ന് സാധിച്ചിട്ടുണ്ട്. ഒരുകാലത്ത് ബി ഗ്രേഡ് ചിത്രങ്ങളിൽ അഭിനയിച്ച താരത്തെ ഇന്ന് തേടിയെത്തുന്നത് ക്യാരക്ടർ റോളുകളാണ്. സിനിമയിലും ജീവിതത്തിലും പുതിയ മാറ്റങ്ങൾ തേടുന്ന ഷക്കീലയുടെ വിശേഷങ്ങളിലൂടെ...

- അപ്പൂസ് കെ.എസ്

തെറ്റുചെയ്യാത്തവരായി ആരുമില്ല ഗോപു. ഈ ഡയലോഗ് പരിചയമില്ലാത്ത മലയാളികൾ ഉണ്ടാവില്ല. ഈ ഡയലോഗിന് ഇത്രയധികം ജനശ്രദ്ധ ലഭിക്കുമെന്ന് അന്ന് വിചാരിച്ചിരുന്നോ?

ഒരിക്കലുമില്ല. എനിക്ക് ഡയറക്ടർ പറഞ്ഞുതന്ന ഡയ ലോഗ് ഞാൻ അതേപോലെ പറഞ്ഞുവെന്ന് മാത്രം. ഒരിക്കലും ഇതിന് ഇത്രയധികം സ്വീകാര്യത കിട്ടുമെന്ന് ഒരിക്കലും വിചാരിച്ചിരുന്നില്ല.

പഠനത്തിൽ മികവ് പുലർത്താതിരുന്ന ഷക്കീല എങ്ങനെയാണ് ഇത്രയധികം നന്നായി ഇംഗ്ലീഷ് ഭാഷ കൈകാര്യം ചെയ്യാൻ പഠിച്ചത്?

എല്ലാം ക്ലാസുകളിലും തോറ്റുപഠിച്ച ഒരു വിദ്യാർത്ഥിനിയായിരുന്നു ഞാൻ. ഒന്നാം ക്ലാസിലും രണ്ടാം ക്ലാസിലും മൂന്നാം ക്ലാസിലും അങ്ങനെ പത്താം ക്ലാസിൽ വരെ ഞാൻ തോറ്റു തോറ്റാണ് പഠിച്ചത്. പക്ഷേ ബേസിക് എഡ്യൂക്കേഷൻ ലഭിച്ചത് ഇംഗ്ലീഷ് മീഡിയം സ്ക്കൂളിൽ നിന്നാണ്. എന്റെ ഡാഡിക്ക് പഠിക്കാനുള്ള അവസരം ഉണ്ടായിട്ടില്ല. അതു കൊണ്ട് എന്നെ നന്നായി പഠിപ്പിക്കണമെന്ന് അദ്ദേഹത്തിന് ആഗ്രഹമുണ്ടായിരുന്നു. എട്ടാം ക്ലാസിൽ നിന്ന് നേരിട്ട് പത്താം ക്ലാസിലേക്ക് എന്നെ ചേർത്തപ്പോഴും എന്റെ മനസ്സിൽ ഞാൻ തോൽക്കുമെന്ന് അറിയാമായിരുന്നു. പക്ഷേ ഡാഡിയുടെ ഒരേയൊരു വാശി കൊണ്ടാണ് പത്താം ക്ലാസ് പരീക്ഷ എഴുതിയത്. എല്ലാ വിഷയത്തിനും തോറ്റുപോയിരുന്നു. പിന്നീട് ഇംഗ്ലീഷ് ഭാഷ കൈകാര്യം ചെയ്യാൻ തുടങ്ങിയത് കോമിക് ബുക്കുകൾ വായിച്ചുകൊണ്ടായിരുന്നു. ഒരുപാട് കോമിക് ബുക്കുകൾ ഞാൻ വായിച്ചിട്ടുണ്ട്. അങ്ങനെയാണ് ഇംഗ്ലീഷ്ഭാഷ എളുപ്പം കൈകാര്യം ചെയ്യാൻ പഠിച്ചത്. ആളുകളോട് ആശയവിനിമയം നടത്താനുള്ള ഇംഗ്ലീഷ് ഭാഷ എനിക്ക് കൈകാര്യം ചെയ്യാൻ സാധിക്കും. അമേരിക്കയിലോ മറ്റും പോയാലും ഞാൻ ഇംഗ്ലീഷ് സംസാരിച്ചിട്ട് എങ്ങനെയെങ്കിലും പിടിച്ചുനിൽക്കും. അതിൽ കൂടുതൽ ഇംഗ്ലീഷ് പരിജ്ഞാനമൊന്നും എനിക്കില്ല. അതിന്റെ ആവശ്യവും എനിക്കുണ്ടെന്ന് തോന്നുന്നില്ല.

മലയാളികൾ നൽകുന്ന സ്നേഹത്തിനോട് എന്ത് മറുപടിയാണ് നൽകാനുള്ളത്?

 കേരളത്തിലെ ആരാധകർ എനിക്കെന്നും പ്രിയപ്പെട്ടവരാണ്. ഞാൻ ജനിച്ചതും പഠിച്ചതും വളർന്നതും തമിഴ്നാട്ടിലാണ്. പക്ഷേ എനിക്കേറ്റവുമധികം പ്രശസ്തിയും സ്നേഹവും ലഭിച്ചത് കേരളത്തിൽ നിന്നാണ്. അതു കൊണ്ടുതന്നെ മലയാളികളോട് പ്രത്യേകമായ ഒരു അടുപ്പമുണ്ട്. എന്നും നിങ്ങൾ നൽകുന്ന സ്നേഹം നില നിൽക്കാൻ ഞാൻ ആഗ്രഹിക്കുന്നു.