മാറുന്ന കാഴ്ചസംസ്കാരവും മായാത്ത തിയേറ്റർ ഓർമ്മകളും

അന്നൊക്കെ ഒട്ടുമിക്ക ചിത്ര ങ്ങളും 100 ദിവസം അടുപ്പിച്ച് ഓടും

- അനീഷ് മോഹനചന്ദ്രൻ

2000 ആണ്ട് ജനുവരി മാസം. തിരുവനന്തപുരം തമ്പാനൂർ ശ്രീകുമാർ തീയേറ്ററിന് മുന്നിൽ വലിയൊരു ആൾക്കൂട്ടം. കാരണം ആരാഞ്ഞ് പലരും അങ്ങോട്ട് വന്നു കൊണ്ടേയിരിക്കുന്നു. അതോടെ ആൾക്കൂട്ടം തിക്കിനും തിരക്കിനും വഴിമാറി. അതിനിടെ ആരോ വിളിച്ചുപറ ഞ്ഞു. ലാലേട്ടൻ അകത്തുണ്ട്. തുടർന്ന് തീയേറ്റർ പരിസരത്ത് ആവേശം ആർത്തിരമ്പി. അതോടെ മോഹൻലാലിനെ കാണാൻ കൂടുതൽപ്പേർ അവി ടേയ്ക്ക് ഒഴുകിയെത്തി. നേരം നട്ടുച്ചയിലേക്ക് കടക്കുകയാണന്നോർക്കണം. പൊള്ളുന്ന ചൂടിനെ അവഗണിച്ച് എല്ലാവരും ക്ഷമയോടെ കാത്തുനിന്നു. തീയേറ്ററിനകത്ത് നിന്നും പുറത്തേയ്ക്ക് വരുന്ന തങ്ങളുടെ പ്രിയപ്പെട്ട ലാലേട്ടനെ ഒരു നോക്കുകാണാനുള്ള ആ നിൽപ്പ് മണിക്കൂറുകൾ പിന്നിട്ടു.

നേരം 1.30 കഴിഞ്ഞു. തീയേറ്ററിനുള്ളിൽ നിന്നും ആരൊക്കെയോ പുറത്തേക്ക് വരുന്നുണ്ട്. ആദ്യം എത്തിയത് സംവിധായകൻ ഷാജി കൈലാസ് ആയിരുന്നു. പിന്നാലെ തിരക്കഥാകൃത്ത് രഞ്ജിത്ത്(അന്ന് രഞ്ജിത്ത് സംവിധായകൻ ആയിട്ടില്ല). തുടർന്ന് ചില സിനിമാപ്രവർത്തകരും എത്തി. ആൾക്കൂട്ടത്തിൽ നിന്നും ആരോ വിളിച്ചുചോദിച്ചു. ലാലേട്ടൻ എവിടെ? അദ്ദേഹത്തെ ആശ്വസിപ്പിക്കാനെന്നോണം ഷാജി കൈലാസ് പറഞ്ഞു ലാലേട്ടൻ എത്തിയിട്ടില്ല. അദ്ദേഹത്തിന്റെ ചിത്രത്തിന്റെ പ്രിവ്യൂ ആയിരുന്നു. ജനുവരി 25 ന് ചിത്രം റിലീസ് ചെയ്യും. നിങ്ങളെല്ലാവരും കാണണം. ഈ ചിത്രത്തെ നിങ്ങൾ വേണം സൂപ്പർഹിറ്റാക്കാൻ. അവിടെ  കൂടിനിന്നവരെല്ലാം കൈകൊട്ടി. തുടർന്ന് ഷാജി കൈലാസിന് ഷേക്ക് ഹാൻഡ് കൊടുക്കാനും അനുമോദനങ്ങൾ അറിയിക്കാനും ചിലരെത്തി. ഇതെല്ലാം കണ്ട് മാറിനിന്ന രഞ്ജിത്ത് ചിരിക്കുന്നുണ്ടായിരുന്നു. തന്റെ പുതിയ ചിത്രം സൂപ്പർ ഹിറ്റാകുമെന്ന പ്രതീക്ഷ ആ ചിരിയിൽ വ്യക്തം.