ഗാർഡിയൻ ഏയ്ഞ്ചൽ

ദേവന്റെയും ഗീതുവിന്റെയും ആത്മനൊമ്പരങ്ങൾ

- എം.എസ്. ദാസ് മാട്ടുമന്ത

ദ്രുതഗതിയിലുള്ള ജീവിതയാ ത്രയിലെ കണ്ണാടിയിൽ ഒരു നാണ യത്തിന്റെ രണ്ടുവശം പോലെ തെളിഞ്ഞുവരുന്ന വൈവിധ്യങ്ങൾ ഓരോ വ്യക്തിയുടേയും ജീവിത പരിസരങ്ങളെ ആർദ്രമാക്കുന്നു. മനസ്സിനെ തരളിതമാക്കുന്ന ഇത്തരം ആർദ്രതയിൽ അസ്വസ്ഥതയുടെ നെരിപ്പോടുമായി ആത്മ സംഘർഷങ്ങളും ഇടംപിടിക്കാറുണ്ട്.

കച്ചവടവൽക്കരിക്കപ്പെട്ട സാമൂഹ്യജീവിതത്തിൽ ഓരോ വ്യക്തിയും ഏകാന്തതയുടെ അപാരതകളിലൂടെയുള്ള സഞ്ചാരത്തിനിടയിൽ കാലിടറി വീണ് ഒറ്റപ്പെടലിന്റെ തുരുത്തുകളിലേക്ക് വലിച്ചെറിയപ്പെടുമ്പോൾ സ്നേഹത്തിന്റെ കൈത്തിരിയുമായി വരുന്ന മാലാഖമാരെ ആർക്കാണ് വിസ്മരിക്കാനാവുക...?

മലയാള സിനിമയിൽ വൈജാത്യ പൂർണ്ണമായ കഥാസ ന്ദർഭങ്ങളെയും ഹൃദയത്തിൽ തട്ടുന്ന തരത്തിൽ കഥ പറയുന്ന പ്രതിഭകളായ സംവിധായകരേയും പ്രേക്ഷകർ എല്ലാക്കാലത്തും ഹൃദയത്തോട് ചേർത്ത് നിർത്താറുണ്ട്. ഇത്തരത്തിൽ ജീവിത പ്രയാണത്തിലെ പ്രക്ഷുബ്ധമായ രണ്ട് തലങ്ങളിലുള്ള ദർശനങ്ങളെ കോർത്തിണക്കുന്ന ചിത്രമാണ് ഗാർഡിയൻ ഏയ്ഞ്ചൽ. നോക്കെത്താ ദൂരത്തോളം പരന്നു കിടക്കുന്ന നെൽപ്പാടങ്ങളും, ആഞ്ഞുവീശുന്ന പാണ്ടിക്കാറ്റിൽ ആടിയുലയുന്ന മധുരക്കള്ള് ചുരത്തുന്ന കരിമ്പനകളും ഹരിതാഭ പെയ്തിറങ്ങുന്ന ഗ്രാമ്യ സംസ്കൃതിയുടെ ലാവണ്യാത്മകതയും മുഖമുദ്രയായുള്ള പാലക്കാടിന്റെ മനോഹരമായ പശ്ചാത്തലത്തിലാണ് ഗാർഡിയൻ ഏയ്ഞ്ചലിന്റെ കഥാവഴികൾ അനാവരണം ചെയ്യുന്നത്.