സിനിമ അടങ്ങാത്ത ആഗ്രഹം ആണ്!

ഹൈസ്ക്കൂൾ മുതൽ കോളേജ് വിദ്യാഭ്യാസകാലം വരെ ഏത് അധ്യാപകർ ക്ലാറിയിൽ വന്നു 'ഭാവിയിൽ ആരാവാനാണ് ആഗ്രഹം' എന്ന് ചോദിച്ചാലും എനിക്ക് ഒറ്റ ഉത്തരമേ ഉണ്ടായിരുന്നുള്ളൂ. സിനിമാ നടൻ ആവണം. കാലം എത്ര മാറി മറിഞ്ഞിട്ടും ഒരിക്കൽപോലും മാറ്റിപ്പറയാൻ തോന്നാതിരുന്ന ആ ആഗ്രഹത്തിന് ഇന്ന് ചിറക് മുളച്ചിരിക്കുകയാണ്. കഴിഞ്ഞ പതിനഞ്ച് വർഷമായി കൊച്ചി പള്ളുരുത്തിക്കാരൻ ആയ നന്ദൻ ഉണ്ണി ഇന്ന് ഏറെ ആരാധകരുള്ള സിനിമ നടൻ ആണ്.

-  രജനി കൃഷ്ണ

പഴയകാലത്ത്, ഞാൻ ആരാധിച്ചിരുന്ന പല നടന്മാരും നന്നായി മിമിക്രി ചെയ്യുന്നവർ ആയിരുന്നു. അതുകൊണ്ടുതന്നെ, മിമിക്രി ആണ് സിനിമയിലേക്കുള്ള ആദ്യപടി എന്ന് ഞാനും വിശ്വസിച്ചിരുന്നു. പല പ്രമുഖരുടെയും ശബ്ദം അനുകരിക്കാൻ പഠിച്ചു. സിനിമാ താരങ്ങൾ സ്റ്റേജുകളിൽ സ്കിറ്റ് ചെയ്യുന്നത് കണ്ട് അത്തരം സ്കിറ്റുകൾ തട്ടിക്കൂട്ടാനുള്ള ശ്രമങ്ങൾ തുടങ്ങി. കലോത്സവങ്ങളിൽ സ്ഥിരം വിജയിയായി മാറി. ഓരോ പുതിയ മിമിക്രി അഭ്യാസങ്ങൾ പഠിച്ചശേഷം പ്രശസ്ത കലാകാരൻ ആയ സാജൻ പള്ളുരുത്തിയെ പോയി കാണും. കലാഭവനിൽ ചേരണം എന്നായിരുന്നു ആഗ്രഹം. പക്ഷേ പല കാരണങ്ങൾ കൊണ്ട് നടന്നില്ല. പിന്നീട് ഞാനും സുഹൃത്തുക്കളും കൂടി ഒരു കോമഡി ട്രൂപ്പ് തുടങ്ങി. ഒരു അമ്പലത്തിലെ ഉത്സവവേദിയിൽ തുടക്കം കുറിച്ച ആ ഗ്രൂപ്പ്, ഞങ്ങളുടേതല്ലാത്ത കാരണങ്ങളാൽ അതേ പരിപാടിക്ക് ഇടയിൽ വച്ച് തന്നെ നിർത്തി പിരിച്ചുവിടേണ്ടി വന്നു. അക്കാലത്ത് സിനിമാ കാസ്റ്റിംഗ് കോളുകൾ പത്രങ്ങളിലും മാസികകളിലുമായിരുന്നു വരുന്നത്. ഒരിക്കൽ പത്രത്തിൽ കുട്ടികളുടെ സിനിമയിലേക്ക് അഭിനേതാക്കളെ ക്ഷണിക്കുന്നു എന്ന വാർത്ത കണ്ട് അച്ഛനുമായി തിരുവനന്തപുരത്തേയ്ക്ക് ചെന്നു. സിനിമയിൽ അഭിനയിക്കണം എങ്കിൽ 5000 രൂപ അവർക്ക് നൽകണമത്രേ. കയ്യിൽ പൈസ ഇല്ലാത്ത ആ സാഹചര്യത്തിലും എന്റെ ആഗ്രഹത്തിന് വേണ്ടി അച്ഛൻ എവിടെനിന്നോ പൈസ ഒപ്പിച്ച് അവർക്ക് നൽകി. പിന്നീടാണ് അതൊരു വലിയ ചതിവായിരുന്നു എന്ന് തിരിച്ചറിഞ്ഞത്. അതോടെ അത്തരം ഓഡിഷനുകൾക്ക് തല വയ്ക്കുന്ന പരിപാടി നിർത്തലാക്കി.