ബന്ധുക്കൾ ശത്രുക്കൾ

ഒരു മനുഷ്യൻ എങ്ങനെയാണ് ഇത്രത്തോളം ജോലികൾ ചെയ്യുക എന്നോർത്ത് അതിശയപ്പെട്ടിട്ടുണ്ട്

- ഇന്ദു മേനോൻ

എനിക്ക് ശ്രീകുമാരൻ തമ്പിയെ വ്യക്തിപരമായി അന്നും ഇന്നും അറിയുകയേ ഇല്ല. എന്നാൽ, അദ്ദേഹത്തെപ്പറ്റി ഓർമിക്കുമ്പോൾത്തന്നെ ബന്ധുക്കൾ ശത്രുക്കൾ' എന്ന സിനിമ ഓർമവരും. അതൊരു അടയാളപ്പെടുത്തലാണ്. അത് മറ്റൊന്നല്ല, എന്റെ ബന്ധുക്കളും എന്നാൽ, ശത്രുക്കളുമായിരുന്ന അനവധി മുഖങ്ങൾ നിഴലിക്കുന്ന ഒരവസ്ഥ. കുട്ടിക്കാലം മുതൽത്തന്നെ ഉള്ളിലുറഞ്ഞ ഒരു ചിന്തയാണത്. എന്തുകൊണ്ടാണ് മനുഷ്യരിങ്ങനെ? ബന്ധുക്കളായി നടിക്കയും ശത്രുക്കളായി ഉള്ളിൽ പല്ലിറുമ്മുകയും ചെയ്യുന്ന പലജാതി മനുഷ്യർ. അവരെ യഥാതഥമായി സ്വാംശീകരിച്ചപോലെ, യു.പി. സ്കൂളിൽ വെച്ച് കണ്ട "ബന്ധുക്കൾ ശത്രുക്കൾ' എന്ന ചലച്ചിത്രം. മറ്റ് ശ്രീകുമാരൻ തമ്പി ചലച്ചിത്രങ്ങളെല്ലാം യുവജനോത്സവമൊഴിച്ച് എനിക്ക് അറിവുള്ളതോ ഓർമയുള്ളതോ ആയിരുന്നില്ല.

പിന്നീട് വളർന്നുവന്നപ്പോൾ, കേൾക്കുന്ന പാട്ടുകളുടെ 80 ശതമാനവും ശ്രീകുമാരൻ തമ്പി രചന എന്ന് അത്യദ്ഭുതത്തോടെ അറിഞ്ഞു. ഈ മനുഷ്യന് ഉറക്കമൊന്നുമില്ലേ, എങ്ങനെയിങ്ങനെ പണിയെടുക്കുന്നുവെന്ന് കൗതുകപ്പെട്ടു.

പിന്നീട്, മാതൃഭൂമിയിൽ വന്ന അദ്ദേഹത്തിന്റെ ആത്മകഥയിലൂടെ തമ്പിയെന്ന, അമ്മയുടെ ഓമന മകനെയും അവൻ ജീവിതത്തിലനുഭവിച്ച പ്രതിസന്ധികളെയും തമ്പിയെന്ന എൻജിനീയറായ സിനിമാക്കാരനെയും മകൻ മരിച്ചുവെന്ന ഹൃദയവേദനയോടെ ഒരിക്കലുമുറങ്ങാതായിപ്പോയ തമ്പിയെന്ന അച്ഛനെയും വായിച്ച് ‘സ്വന്തം' എന്ന് ലേബലിട്ട് മനസ്സിൽ സൂക്ഷിക്കാൻ കഴിഞ്ഞു.

എങ്ങനെയാണ് ഒരു മനുഷ്യൻ ഇത്രത്തോളം ജോലി ചെയ്തിരിക്കുകയെന്ന കൗതുകം, ആദരവ്, അമ്പരപ്പ് എല്ലാം അന്നും ഇന്നും എന്റെയുള്ളിലുണ്ട്. സിനിമയിൽ മമ്മൂട്ടിയെയാണ് ഞാൻ ഇങ്ങനെ അദ്ഭുതത്തോടെ നോക്കിക്കണ്ടിട്ടുള്ളത്.

മലയാളസിനിമയുടെ ചരിത്രത്തിൽ ഇതുപോലെ കഠിനാധ്വാനം ചെയ്ത ഒരാളില്ല. മൂവായിരം പാട്ടുകളാണ് അദ്ദേഹമെഴുതിയത്. ഒരുപക്ഷേ, ഇന്നുവരെ മലയാളം കണ്ടതിൽ വെച്ച്, കേട്ടതിൽ വെച്ച്, ഏറ്റവും മനോഹരമായ പാട്ടുകൾ പലതും അദ്ദേഹത്തിന്റെ സ്വന്തമാണ്.