നിരാശാജനകം കേന്ദ്ര ബജറ്റ്

ഇടക്കാല ബജറ്റിൽ രാസവള സബ്സിഡിയിൽ 25,000 കോടി രൂപയുടെ കുറവാണുള്ളത്. ഇത് രാസവളവില കുത്തനെ ഉയരുന്നതിനു കാരണമാകും

പൊതുതിരഞ്ഞെടുപ്പിനെ നേരിടാൻ പോകുന്നതിനു തൊട്ടുമുൻപുള്ള സർക്കാരുകൾ ജനപ്രീതി പിടിച്ചുപറ്റുന്ന പദ്ധതികൾ പ്രഖ്യാപിക്കാറുണ്ട്. എന്നാൽ, മോദി സർക്കാർ വ്യത്യസ്ത നിലപാടാണ് സ്വീകരിച്ചത്. ഇക്കഴിഞ്ഞ ഫെബ്രുവരി ഒന്നിന് കേന്ദ്ര ധനമന്ത്രി നിർമല സീതാരാമൻ അവതരിപ്പിച്ച ഇടക്കാല ബജറ്റിൽ തിരഞ്ഞെടുപ്പിനെ ലക്ഷ്യമാക്കിയുള്ള പ്രഖ്യാപനങ്ങളൊനും കാണാനാവില്ല. 2024-25 ലെ പൂർണ ബജറ്റ് അവതരിപ്പിക്കുന്നതിനുള്ള അവകാശം മേയ് മാസത്തിൽ അധികാരമേൽക്കുന്ന പുതിയ സർക്കാരിനാണ്.

ഇടക്കാല ബജറ്റിന്റെ അടങ്കൽ തുക 47.66 ലക്ഷം കോടി രൂപയാണ്. ഇതിൽ കൃഷിക്കും അനുബന്ധ മേഖലകൾക്കുമായി വകകൊള്ളിച്ചിരിക്കുന്നത് 1.27 ലക്ഷം കോടി മാത്രം. അതായത്, ആകെയുള്ളതിന്റെ വെറും 2.78%. കാർഷികമേഖല, കന്നുകാലി സംരക്ഷണം, മീൻകൃഷി, ചനപരിപാലനം എന്നിവയ്ക്ക് എല്ലാം കൂടിയാണ് ഈ തുക. ഇതിൽ തന്നെ 60,000 കോടി രൂപ കർഷകർക്ക് പ്രതി വർഷം 6000 രൂപ വീതം നേരിട്ടു നൽകുന്ന പ്രധാനമന്ത്രി കിസാൻ സമ്മാൻ പദ്ധതിക്കുള്ളതാണ്. കൂടാതെ, 9,941 കാടി രൂപ കാർഷിക ഗവേഷണമേഖലയ്ക്കു മാറ്റി വച്ചിണ്ട്. ശേഷിക്കുന്ന തുച്ഛമായ തുക മാത്രമേ കൃഷി, അനുബന്ധ മേഖലകൾക്കുള്ളൂ. ഇതാണ് കേന്ദ്ര ബജറ്റിന്റെ പൊതുസ്ഥിതി.

അതേസമയം ഇന്ത്യൻ കാർഷികമേഖലയുടെ അവസ്ഥ എന്താണ്? രാജ്യം സാമ്പത്തികമായി പുരോഗമിക്കുമ്പോൾ സാമൂഹിക മുന്നേറ്റവും ഉണ്ടാകും. സാമൂഹികമായി മുന്നേറുകയെന്നാൽ ജനങ്ങളുടെ വിദ്യാഭ്യാസം, ആയുർ ദൈർഘ്യം മുതലായ വികസന അളവുകോലുകളിലുണ്ടാകുന്ന പുരോഗതിയാണ്.