വീപ്പയിലെ ഞണ്ട് വളരുന്ന വരുമാനം

ഞണ്ടുകൊഴുപ്പിക്കലിന് പുതുരീതി

- ജെ.ജേക്കബ്

അഞ്ഞൂറു രൂപയ്ക്കു വാങ്ങുക, 200 രൂപ വിലയുള്ള ഡ്രമ്മിലാക്കി വെള്ളത്തിലിടുക. 25-30 ദിവസം പരമാവധി 200 രൂപയുടെ തീറ്റ കൊടുക്കുക. 2,800 രൂപയ്ക്കു വിൽക്കുക. ലാഭം കിട്ടിയ 1,800 രൂപ കീശയിലിടുക എങ്ങനെയുണ്ട് ഐഡിയ? അതാണ് ന്യൂജെൻ ഞണ്ടു കൊഴുപ്പിക്കൽ. കായലരികത്ത് ഇത്തിരി സ്ഥലവും ഉപ്പുവെള്ളവും ലഭ്യമായവർക്ക് ഞണ്ടുകൊഴുപ്പിക്കലിലൂടെ പണമുണ്ടാക്കാൻ സഹായമെത്തിക്കുകയാണ് എറണാകുളം പനങ്ങാടുള്ള സ്റ്റെം എന്ന അഗ്രി സ്റ്റാർട്ടപ്.

കേരള യൂണിവേഴ്സിറ്റി ഓഫ് ഫിഷറീസ് ആൻഡ് ഓഷ്യൻ സ്റ്റഡീസ് അഥവാ കുഫോസിലെ ബിരുദാനന്തര ബിരുദ വിദ്യാർഥികളായ അരുൺദാസ്, അശ്വതി എന്നിവരാണ് ഇതിനു പിന്നിൽ. ബിരുദപഠനകാലം മുതൽ അക്വാകൾചർ രംഗത്തെ സംരംഭസാധ്യതകൾ തിരിച്ചറിഞ്ഞു നടത്തിയ പഠന, ഗവേഷണങ്ങളാണ് ഇവരുടെ മുതൽക്കൂട്ട്, സ്വന്തമായി ഉൽപാദനമെടുക്കുന്നതിനൊപ്പം മത്സ്യക്കർഷകർക്ക് കൺസൽറ്റൻസി സേവനവും ഇവർ നൽകുന്നുണ്ട്. പരമ്പരാഗത രീതിയിലെ ചില പരിമിതികൾ മറികടക്കാൻ വ്യത്യസ്ത ശൈലിയിലാണ് ഇവരുടെ കൊഴുപ്പിക്കൽ.

പരമ്പരാഗതരീതിയിൽ കുളങ്ങളിൽ വളർത്തുമ്പോൾ ഞണ്ടുകൾ പരസ്പരം ആക്രമിക്കുകയും തീറ്റയാക്കുകയും ചെയ്യും. ഇത് വലിയ നഷ്ടമുണ്ടാക്കും. മാത്രമല്ല, വെള്ളത്തിനടിയിലെ ഞണ്ടിന്റെ വളർച്ച കൃത്യമായി നിരീക്ഷി ക്കാനും കഴിഞ്ഞിരുന്നില്ല. ഇത് ഒഴിവാക്കാനായി വെള്ളത്തിൽ പൊന്തിക്കിടക്കുന്ന ബോക്സകളിലും മറ്റും ഞണ്ടിനെ വളർത്തുന്ന ഫ്ലോട്ടിങ് സംവിധാനം ഉരുത്തിരിഞ്ഞിരുന്നു. എന്നാൽ, ചൂടുമൂലം ഞണ്ടു ചത്തുപോകുന്നത്ഇതിന്റെ പരിമിതിയായിരുന്നു. ഈ പ്രശ്നങ്ങൾക്കെല്ലാം പരിഹാരമായാണ് അരുൺദാസും അശ്വതിയും ചേർന്ന് ഹാങ്ങിങ് രീതി വികസിപ്പിച്ചത്. വെള്ളം കയറിയിറങ്ങാനായി തുളകളിട്ട ബാരലുകളിൽ വളർത്തുന്ന രീതിയാണിത്. 60 സെന്റിമീറ്ററോളം ആഴമുള്ള ബാരലുകളായതിനാൽ ഞണ്ടി നു ചൂട് പ്രശ്നമാവില്ല. പുതിയ രീതി വികസിപ്പിച്ച് സ്വയം കൃഷി ചെയ്യുന്നതിനൊപ്പം മറ്റ് കർഷകരെ പഠിപ്പിക്കാനും ഇവർ തയാറാവുന്നുണ്ട്. പനങ്ങാട് ഇതിനകം നൂറോളം കൃഷിക്കാർക്ക് പരിശീലനം നൽകിക്കഴിഞ്ഞു.