പിഞ്ചുമനസ്സിന്റെ മാറ്റങ്ങൾ അറിയണം

കാഴ്ചയും കേൾവിയും സ്പർശവും വഴി ലോകത്തെ അറിയാനും പരസ്പര ബന്ധങ്ങൾ ഉൾക്കൊള്ളാനുമുള്ള പ്രാഗല്ഭ്യം കുഞ്ഞുങ്ങൾക്ക് ജനനം തൊട്ടേയുണ്ട്. മാനസിക വളർച്ച മെച്ചപ്പെടുത്താൻ ഓരോ ഘട്ടത്തിലും അത്തരത്തിൽ എന്തൊക്കെ ഇടപെടലുകൾ സാധ്യമാണെന്ന് മനസ്സിലാക്കേണ്ടതുണ്ട്

- ഡോ.ഷാഹുൽ അമീൻ സൈക്വാട്രിസ്റ്റ്, സെന്റ് തോമസ് ദഹാസ്പിറ്റൽ, ചങ്ങനാശ്ശേരി (എഡിറ്റർ, ഇന്ത്യൻ ഭജണൽ ഓഫ് സൈക്കോളജിക്കൽ-മെഡിസിൻ) www.mind.in

ജനിക്കുന്ന ഓരോ കുഞ്ഞിലും അത് ഏത് അച്ഛനമ്മമാർക്കോ പരിതസ്ഥിതിയിലോ ആകട്ടെ, മനുഷ്യകുലത്തിന്റെ വല്ലഭത്വം ഒന്നുകൂടി പിറക്കുകയാണ്." ജയിംസ് എ.ജി.

കുട്ടികളുടെ മനോവികാസത്തിന്റെ സ്വാഭാവികക്രമത്തെയും അതിനെ നിർണയിക്കുന്ന ഘടകങ്ങളെയും കുറിച്ച് ഉൾക്കാഴ്ച നേടുന്നത്, അതിന് ആവശ്യമായ പിൻബലം കൊടുക്കാൻ കുടുംബാംഗങ്ങളെയും അധ്യാപകരെയും പ്രാപ്തരാക്കും. കുട്ടിയുടെ പെരുമാറ്റം, വികാരപ്രകടനങ്ങൾ, കാര്യങ്ങൾ ഗ്രഹിക്കാനുള്ള ശേഷി എന്നിവയെപ്പറ്റി യാഥാർഥത്തിലൂന്നിയ പ്രതീക്ഷകൾ പുലർത്താനും ആ ഉൾക്കാഴ്ച വഴികാട്ടിയാകും.

സുപ്രധാന സ്വാധീനങ്ങൾ

എങ്ങനെ വളരണമെന്ന നിർദേശം ഓരോ കോശത്തിനും കൊടുക്കുന്നത് അവയിലുള്ള ക്രോമൊസോമുകളിലെ ജീനുകളാണ്. അവയ്ക്കാണ് മനോവികാസം നിർണയിക്കുന്നതിൽ മുഖ്യപങ്കുള്ളത്. എങ്കിലും ഒരേ പ്ലാൻ വെച്ച് പണിയുന്ന രണ്ട് വീടുകൾ വ്യത്യാസപ്പെടാമെന്നപോലെ, ജീനുകളുടെ നിർദേശങ്ങളെ അക്ഷരംപ്രതി പാലിച്ചുകൊണ്ടല്ല വളർച്ച പുരോഗമിക്കുന്നത്. ജീവിതചുറ്റുപാടിലെ പല ഘടകങ്ങളും ജീനുകളുടെ പ്രവർത്തനത്തെ നിയന്ത്രിക്കുന്നുണ്ട്. അച്ഛനമ്മമാർ, മറ്റ് ബന്ധുക്കൾ, സുഹൃത്തുക്കൾ, അധ്യാപകർ, കുഞ്ഞുപ്രായത്തിലേൽക്കുന്ന വിവിധ പീഡനങ്ങൾ, മറ്റ് ജീവിതാനുഭവങ്ങൾ, സാമ്പത്തികനില, ആരോഗ്യസ്ഥിതി എന്നിവ അതിൽ പ്രധാനമാണ്. ബുദ്ധി, പൊതുവേയുള്ള മൂഡ്, അക്രമവാസന തുടങ്ങിയവ ജീനുകൾക്കും പരിതസ്ഥിതികൾക്കും സ്വാധീനമുള്ള ഗുണങ്ങളിൽപ്പെടുന്നു. ഉദാഹരണത്തിന്, ബഹളഭരിതമായ അന്തരീക്ഷങ്ങൾ ബൗദ്ധിക ശേഷിയെ ദുർബലമാക്കു ന്നുണ്ട്.ഇതിന്റെ വിവക്ഷ, ഒരു കുട്ടി പഠനത്തിലോ മറ്റോ മുന്നാക്കമോ പിന്നാക്കമോ ആയാൽ അതിന്റെ നേട്ടമോ പഴിയോ മാതാപിതാക്കളോ അധ്യാപകരോ മൊത്തമായി ഏറ്റെടുക്കേണ്ടതില്ല എന്നതാണ്.

വളർച്ചയുടെ ഓരോ ഘട്ടത്തിലും അങ്ങനെ എന്തൊക്കെ ഇടപെടലുകൾ സാധ്യമാണ് എന്ന് നോക്കാം.

അമ്മയാകാൻ ഒരുങ്ങുമ്പോൾ

സ്വന്തം ആരോഗ്യം ശ്രദ്ധിക്കുക.

റുബെല്ല രോഗത്തിനെതിരായ വാക്സിൻ എടുത്തിട്ടുണ്ടെന്ന് ഉറപ്പുവരുത്തുക. ഗർഭകാലത്ത് റുബെല്ല വരുന്നത് കുട്ടിയുടെ തലച്ചോറിനെ ബാധിക്കാം.

മദ്യപാനവും പുകവലിയും ലഹരിയുപയോഗവും ഒഴിവാക്കുക.

മരുന്നുകൾ കഴിക്കുന്നുണ്ടെങ്കിൽ അവ തുടരേണ്ടത് അത്യാവശ്യമാണോയെന്ന് ഡോക്ടറോട് ചർച്ചചെയ്യുക.