Bay Window

പുതിയ വീടുകളിൽ ഒഴിച്ചു കൂടാനാകാത്ത ഘടകമായി മാറുന്നു ബേ വിൻഡോ

പുതിയ വീടുകളിൽ പ്രചാരമേറിക്കൊണ്ടിരിക്കുന്ന ഒന്നാണ് ബേ വിൻഡോ, കുറഞ്ഞത് ഒരു ജനാലയെങ്കിലും ബേ വിൻഡോയാക്കി മാറ്റിയിട്ടുണ്ടാവും പുതുവീടുകളിൽ ഇരിക്കാനോ കിടക്കാനോ പാകത്തിൽ ജനാലയ്ക്ക് പടി നൽകുന്നതിനെയാണ് ബേ വിൻഡോ എന്നു പറയുന്നത്.

പഴയകാല വീടുകളിലും ബേ വിൻഡോയുണ്ടായിരുന്നു. പഴയ വീടുകളിലെ കിളിവാതിലുകൾ ബേ വിൻഡോയുടെ ഉദാഹരണമാണ്. അന്ന് സ്ത്രീകൾക്ക് പുറത്തെ കാഴ്ചകൾ കാണാനുള്ള സൗകര്യത്തിനാണ് ജനാലപ്പടി നൽകിയിരുന്നത്. പിന്നീട് ഇടക്കാലത്ത് അവ ഡിസൈനിൽ നിന്ന് മാഞ്ഞുപോയെങ്കിലും വീണ്ടും തിരിച്ചെത്തി. ഈയടുത്തായി ബേ വിൻഡോയോടുള്ള താൽപര്യം വളരെയധികം കൂടിയിട്ടുമുണ്ട്.

What is Bay Window?

ജനാല പുറത്തേക്കു തള്ളുമ്പോൾ അകത്തു കിട്ടുന്ന സ്ഥലത്ത് വീതിയിൽ ജനാലപ്പടി നൽകുന്നു. അതിനെയാണ് ബേ വിൻഡോ എന്നു പറയുന്നത്. ഇവിടെ ഇരിക്കാം, കിടക്കാം. സ്ഥലം കുറവുള്ളയിടത്ത് പുറത്തേക്ക് തള്ളുന്നതിനു പകരം അകത്തേക്കാണ് സ്ഥലമെടുക്കുക. താഴെ നിന്നേ കെട്ടിപൊക്കി സ്ലാബ് നൽകാം. അതല്ല എങ്കിൽ സ്ലാബ് നൽകാതെ വേറിട്ട സീറ്റിങ് നൽകാം. അതിനെ ബേ വിൻഡോ എന്നു കൃത്യമായി നിർവചിക്കാനാകില്ല. ചെറിയ നീളമേ ഉള്ളൂ എങ്കിൽ തടിപ്പലക സ്ക്രൂ ചെയ്തോ മെറ്റൽ ഫ്രെയിമിലോ നൽകുന്നത് ചെലവ് കുറയ്ക്കും.

എന്തിനാണ് ബേ വിൻഡോ?

കിടപ്പുമുറികൾ, ഫാമിലി ലിവിങ് തുടങ്ങിയ ഇടങ്ങളിലാണ് കൂടുതലായും ബേ വിൻഡോ കണ്ടു വരുന്നത്. എവിടെ വേണമെന്നത് ഉപയോഗിക്കുന്നവരുടെ ഇഷ്ടമാണ്. ഇന്നയിടത്തെ പാടുള്ളു എന്ന് സ്ഥാപിത നിയമങ്ങളൊന്നുമില്ല.

ഫാമിലി ലിവിങ് പോലെയുള്ള ഇടങ്ങളിൽ ബേ വിൻഡോ നൽകുമ്പോൾ ഇരിക്കാനായി അധിക സ്ഥലം ലഭിക്കുന്നു എന്നതാണ് ഗുണം. വീട്ടിൽ അതിഥികൾ എത്തുമ്പോഴുമെല്ലാം ആ സ്ഥലം ഉപയോഗിക്കാം. മാത്രമല്ല പുറത്തെ കാഴ്ച ആസ്വദിക്കാനും ബേ വിൻഡോ അവസരമൊരുക്കുന്നു. പച്ചപ്പ്, വീടിനോടു ചേർന്നുള്ള ചെറിയ ജലാശയങ്ങൾ, ഫൗണ്ടൻ എന്നിങ്ങനെ ഭംഗിയുള്ള പുറംകാഴ്ചകളിലേക്കു തുറക്കുന്ന ജനാലകൾ ബേ വിൻഡോയാക്കാം.