പൊളിക്കേണ്ട; പുതുക്കാം

വെറുതെയങ്ങു പൊളിച്ചു കളയുന്നതിലല്ല, പുതുക്കിയെടുക്കുന്നതിലാണ് യുവതലമുറയുടെ ശ്രദ്ധ

വീട് പുതുക്കിപ്പണിയാൻ പലർക്കും പല കാരണ ങ്ങൾ കാണും. വീടിന്റെ പഴക്കമോ സൗകര്യക്കുറവോ കാലത്തിനൊത്ത നിർമാണമല്ലാത്തതോ ഒക്കെ ആയിരിക്കാം. അമ്പലപ്പുഴയിലുള്ള റിജാസ് മുഹമ്മദിന്റെ വീട് നവീകരിക്കാൻ തീരുമാനിക്കുന്നത് വീട്ടിലൊരു വിവാഹം വന്നപ്പോഴാണ്. ആർക്കിടെക്ട് ദമ്പതികളായ ഷഫീക്കും സനയും അത് ഭംഗിയായി പൂർത്തീകരിച്ചു. അതും നാല് മാസം എന്ന കുറഞ്ഞ കാലയളവിൽ.

പ്ലിന്തിന് ബലമുണ്ടെങ്കിൽ ഏതുവീടും പുതുക്കിയെടുക്കാം എന്നാണ് ആർക്കിടെക്ടുമാരുടെ അഭിപ്രായം. ആവശ്യമില്ലാതെ ഒരു വീടും നശിപ്പിക്കേണ്ടതില്ല. കേടില്ലാത്ത നിർമാണസാമഗ്രികൾ പുനരുപയോഗിക്കുന്നതിലും മടി കാണിക്കേണ്ടതില്ല.

സ്ട്രക്ചറിന് കേടില്ലെങ്കിൽ "റീഫർബിഷ് (refurbish) ചെയ്യുന്നതാണ് ഏറ്റവും മികച്ച മാർഗം. സോഫ്ട് ഫർണിഷിങ്ങും ഇന്റീരിയറിലെ അടിസ്ഥാനകാര്യങ്ങളും മാറ്റുന്നതിലൂടെ വീടിനെ പുതിയൊരു തലത്തിലേക്ക് ഉയർത്താനാകും. ഇതിനു വേണ്ടി വലിയ തുക മുടക്കേണ്ടിവരികയുമില്ല. ഇടയ്ക്കിടെ ഇന്റീരിയർ നവീകരിക്കുന്നതും വീടിന് എപ്പോഴും പുതുമ കൊണ്ടുവരാൻ സഹായിക്കും.