പാലക്കാടൻ കാറ്റിൽ...

സങ്കര സംസ്കാരം മണക്കുന്ന കരിമ്പനകളുടെ നാട്. മേഘങ്ങൾ പിറവിയെടുക്കുന്ന കവ. കോലം മായാത്ത അഗ്രഹാര മുറ്റങ്ങൾ. ഞാറ്റുപുരയും അറബിക്കുളവും കാത്തിരിക്കുന്ന ഖസാക്കിന്റെ നാട്. പാലക്കാടിന്റെ ആത്മാവിലേക്കാണ് ഇക്കുറി യാത്ര...

- രമ്യ എസ്. ആനന്ദ്

പാലക്കാട്ടേക്ക് പോകാൻ എപ്പോഴും മൺസൂൺ കാലം വരുന്നത് കാത്തുനിൽക്കും. മഴയിൽ പാലക്കാട് തണുക്കും. മല നിരകൾ നിറയെ മഴമേഘങ്ങൾ നിറയും. മയിലുകൾ പീലിവിടർത്തിയാടുന്ന വയൽവരമ്പുകൾ, പച്ചയണിഞ്ഞ നെൽവയലുകൾ... നമ്മൾ കാണാൻ കൊതിക്കുന്ന മാറ്റമില്ലാത്ത ചില ഗ്രാമക്കാഴ്ചകളുണ്ടിവിടെ.

ഏറ്റവും മനോഹരമായ ഗ്രാമങ്ങൾ കാണണമെങ്കിൽ പാലക്കാട് തന്നെ വരണം. സങ്കര സംസ്കാരമായതുകൊണ്ടുതന്നെ ഇവിടത്തെ കാഴ്ചകൾക്കും മിഴിവേറും. പെരുങ്കായം മണക്കുന്ന കായബജിയും വായിൽ കലാപമുയർത്തി അമരുന്ന അരിമുറുക്കും നിറയുന്ന അതിർത്തി ഗ്രാമങ്ങൾ...

നെൽവയലുകളുടെ നെന്മാറ, പൂരത്തിന്റെ നാടായ ചിനക്കത്തൂർ... ചെണ്ടയും മദ്ദളവും ഇടയ്ക്കയും ഉണ്ടാക്കുന്ന പെരുവെമ്പ്, കഥകളി ഗ്രാമമായ വെള്ളിനേഴി, പച്ചക്കറി വിളയുന്ന പെരുമാട്ടി, ഓണത്തല്ലിന് പേരുകേട്ട പല്ലന.... അനങ്ങൻമലയും പണിക്കർ കുന്നുമുള്ള കീഴൂർ, നെല്ലിയാമ്പതിയുടെ താഴ്വാര ഗ്രാമമായ കൊല്ലങ്കോട്, പാലക്കാട്-തൃശൂർ അതിർത്തി ഗ്രാമമായ പൈങ്കുളം... വാഴാലിക്കാവും ഇവിടെയാണ്.

പുടൂരിലെ മനോഹരമായ നെൽവയലുകൾ. പട്ടാമ്പിയിലേക്ക് പോകുമ്പോൾ കണ്ണാടിപ്പുഴയുടെ തീരത്ത് അസ്തമയവും പറളിയും കാണാം. കല്ലടിക്കോടൻ മലകളുടെ പിന്നാമ്പുറത്തു വിളഞ്ഞു നിൽക്കുന്ന നെൽവയലുകൾ... കുന്തിപ്പുഴയുടെ തീരത്താണ് പുറമത്ര ഗ്രാമം.

പാലക്കാട് ടൗണിൽ നിന്നും വീണ്ടും പോകണം കണ്ണാടി എത്താൻ. കണ്ണാടിയിൽ നിന്നും കുറച്ചുകൂടി പോയാൽ ഒടിയൻ ചിത്രീകരിച്ച തേൻകുറിശ്ശി എത്തും. ചിറ്റിലഞ്ചേരി, നെന്മാറ, മുതലമട... ഗ്രാമക്കാഴ്ചകളുടെ പൂരമൊരുക്കി കുറെയേറെ നാടുകൾ.

യക്ഷിയാനം

മലമ്പുഴ എത്തി വൈകുന്നേരമാണ് ഡാം സൈറ്റ് കാണാൻ ഇറങ്ങിയത്. പശ്ചിമഘട്ട മലനിരകളാണ് മലമ്പുഴ ഡാമിന്റെ ബാക്ക് ഡ്രോപ് തന്നെ. കാത്തിപ്പുഴയുടെ കൈവഴിയായ മലമ്പുഴക്കു കുറുകെ 1955ൽ നിർമിച്ച ഡാം. ചെറുമഴയിൽ നനഞ്ഞുനീങ്ങുന്ന റോപ് വേ അതിൽനിന്നും സന്തോഷത്തോടെ താഴെയുള്ള കാഴ്ചകൾ കാണുന്നവർ. മഴത്തുള്ളികൾ ഡാമിലെ പരപ്പിലേക്ക് ചിതറിവീഴുന്നു.

പരിചരണമില്ലാത്ത പൂന്തോട്ടം. വെട്ടിയൊതുക്കാതെ കളകയറിയ പുൽത്തകിടി. മുകളിൽനിന്നു നോക്കുമ്പോൾ താഴെ ഉദ്യാനത്തിനരികെ, മലനിരകളെ നോക്കി ശരീരത്തിലേക്ക് മഴ ചാറ്റൽ ഏറ്റുവാങ്ങി മലമ്പുഴയുടെ ഐക്കണിക് ലാൻഡ് മാർക്ക് യക്ഷി.