૭૭૭ ચાર્લી: તમે વહાલનો દરિયો, અમે તરસ્યા વ્હાલીડા!

કન્નડ સ્ટાર રક્ષિત શેટ્ટીની ફિલ્મ ‘૭૭૭ ચાર્લી'માં એક શ્વાન અને માણસ વચ્ચેના સંબંધની વાત દર્શાવવામાં આવી છે. એક અબોલા જીવના કારણે એક બોલતા સમજતા માણસમાં આવેલા ફેરફારની વાત ‘૭૭૭ ચાર્લી'માં છે. વિઝ્યુઅલી અને ઇમોશનલી મજબૂત આ ફિલ્મ વિશેની રસપ્રદ વાત અહીં કરી છે.

- પાર્થ દવે

૧૯૮૫માં જેકી શ્રોફ અને પૂનમ ઢિલ્લોન અભિનીત ફિલ્મ ‘તેરી મહેરબાનિયાં' રિલીઝ થઈ હતી, જેમાં માણસ અને શ્વાન વચ્ચેના સંબંધની વાત હતી. ‘તેરી મહેરબાનિયાં' ડિરેક્ટર વિજય રેડ્ડીની જ કન્નડ ફિલ્મ ‘થાલિયા ભાગ્ય’ની સત્તાવાર રિમેક હતી. આ ફિલ્મને લોકોએ સ્વીકારી હતી. વર્ષો બાદ કન્નડ ભાષામાં જ શ્વાન અને માણસ વચ્ચેનો સંબંધ દર્શાવતી ફિલ્મ ‘૭૭૭ ચાર્લી’ આવી, જેમાં કન્નડના જાણીતા અભિનેતા અને ફિલ્મમેકર રક્ષિત શેટ્ટી છે.

અગાઉ આવેલી પ્રાણીઓ અને મનુષ્ય વચ્ચેના સંબંધની કે ‘પ્રાણીઓ બચાવો'ની વાત કરતી હિન્દી ફિલ્મો કરતા ‘૭૭૭ ચાર્લી' તદ્દન અલગ છે. સૌથી મહત્ત્વનો તફાવત તેનું ટેક્નિકલ એલિમેન્ટ છે. ફિલ્મની હાઈ પ્રોડક્શન વેલ્યુ છે અને બીજું, ફિલ્મની વાર્તા. તે કહેવાની રીત.

અહીં ટિપિકલ રિવેન્જ ડ્રામા નથી. શ્વાન દ્વારા વારંવાર દર્શાવવામાં આવતી ને (અક્ષય કુમારની ‘ઇટ્સ એન્ટરટેઇન્મેન્ટ' જેવી) ઉદ્ભવતી ટિપિકલ સ્થૂળ કોમેડી પણ નથી. ‘૭૭૭ ચાર્લી’ રાઇડ છે. કિરણરાજ કે. લિખિત અને ભોશનલ ‘૭૭૭ ચાર્લી'નો ટોન એકદમ સરળ છે. દક્ષિણ ભારતની આજકાલ રિલીઝ થઈ રહેલી ફિલ્મોની જેમ તેમાં એડ્રેનલીન રશ પેદા નથી થતો. અહીં ઠહેરાવ છે. તે દર્શકને બાજુમાં બેસાડીને, શાંતિથી, ધીરજપૂર્વક પોતાની વાત માંડે છે.

ધર્મા (રક્ષિત શેટ્ટી) નામનો એક છોકરો છે. તેનું જીવન નીરસ છે. એકલો રહે છે. એક ફેક્ટરીમાં કામ કરે છે. ત્યાંના સહ-કર્મચારીઓ કે આડોશપાડોશ, કોઈ સાથે તે વાત નથી કરતો. મહોલ્લાના છોકરાઓ તેનાથી ડરે છે. ધર્માને હસતા નથી આવડતું. તેને પોતાને યાદ નથી તે છેલ્લે ક્યારે હસ્યો હતો. હા, તેનો ભૂતકાળ ટ્રેજિક હતો. તેને હજુ પણ ક્યારેક ક્યારેક તે કનડે છે.