મફતની યોજનાઓ સામે કેન્દ્ર અને રાજ્યોએ સતર્ક થવાની જરૂર

માત્ર ચૂંટણી વખતે જ નહીં તો સત્તા મેળવ્યા પછી પણ લોકોને ખુશ કરવા માટે કેટલીક રાજ્ય સરકારો આ પ્રકારની યોજનાઓ અમલમાં મૂકે છે. ક્યારેક સાવ મફત નહીં તો સબસિડાઇઝ એટલે કે ઓછા દરે લોકોને વસ્તુ કે સેવા સુલભ કરાવવાની પ્રવૃત્તિ ચાલે છે

દેશના લોકોને મફત કે વિનામૂલ્યે વસ્તુ કે સેવાઓ આપવાના વધતાં જતાં ચલણ માટે વડાપ્રધાન નરેન્દ્ર મોદીએ ચેતવણી ઉચ્ચારી છે. મતદારોને આકર્ષવા માટે આવો શોર્ટકટ હવે લગભગ બધા રાજકીય પક્ષો ચૂંટણી સમયે અપનાવતા થયા છે. એક રાજકીય પક્ષ આવી રીતરસમ દ્વારા સફળતા મેળવે એટલે અન્ય રાજકીય પક્ષો પણ એવા માર્ગને અનુસરવા લલચાય છે. માત્ર ચૂંટણી વખતે જ નહીં તો સત્તા મેળવ્યા પછી પણ લોકોને ખુશ કરવા માટે કેટલીક રાજ્ય સરકારો આ પ્રકારની યોજનાઓ અમલમાં મૂકે છે. ક્યારેક સાવ મફત નહીં તો સબસિડાઇઝ એટલે કે ઓછા દરે લોકોને વસ્તુ કે સેવા સુલભ કરાવવાની પ્રવૃત્તિ ચાલે છે. અનેકવિધ રાજ્યોમાં આવી યોજનાઓ ચાલે છે. વડાપ્રધાને આવા વલણ સામે ચેતવણી ઉચ્ચારી છે, પણ ખુદ કેન્દ્ર સરકાર પણ આવી કેટલીક યોજનાઓ ચલાવી રહી છે. અંગ્રેજીમાં જેને ‘ફ્રી-બી’ના ટૂંકા નામથી ઓળખવામાં આવે છે એવી આ યોજનાઓ સરવાળે રાજ્ય કે દેશના અર્થતંત્ર માટે નુકસાનકારક પુરવાર થાય છે, એટલે અર્થશાસ્ત્રીઓ તો વર્ષોથી આ વિચારનો વિરોધ કરતા રહ્યા છે.