DNA ડાયેટ અપાવશે ડાયાબિટીસમાં મોટી રાહત

ડાયાબિટીસએ મેટાબોલિક રોગનો એક પ્રકાર છે, જેમાં બ્લડ સુગરનું સ્તર અનિયંત્રિત રીતે વધઘટ થાય છે. કેટલાક લોકો એવું માને છે કે વધારે પડતી સુગર લેવાથી ડાયાબિટીસ થતો હોય છે, પરંતુ મેદસ્વીતાને કારણે પણ ક્યારેક ડાયાબિટીસ થતો હોય છે

શહેરીજીવન અને બદલાયેલી રહેણીકરણીને કારણે રોજિંદા જીવનમાં સ્ટ્રેસનું પ્રમાણ વધી રહ્યું છે. વર્કલોડ અને સ્ટ્રેસને કારણે આજકાલ યુવાવયમાં જ બીપી અને ડાયાબિટીસની સમસ્યા પેદા થવા માંડી છે. અપૂરતી ઊંઘ, અયોગ્ય ડાયેટ તથા સતત સ્ટ્રેસને કારણે મેદસ્વિતા, ડાયાબિટીસ અને હાઇપરટેન્શન સામાન્ય બનતાં જાય છે. સમસ્યા કોઈ પણ હોય તેનાં મૂળમાં ઈને ઉકેલ શોધવામાં આવે તો સમસ્યાને આસાનીથી દૂર કરી શકાય છે.

જાતભાતના ડાયેટ પ્લાનની ચર્ચાઓ સાંભળવા મળે છે. દેશી-વિદેશી ડાયેટ પદ્ધતિઓનું ઊંટવૈદુ લોકો અજમાવે છે, પરંતુ કોઈ નક્કર પરિણામ મળતાં નથી. મેટાબોલિક અમદાવાદના એક્સપર્ટ ડૉ. ઋષિકેશ ત્રિવેદી જણાવે છે કે, ગુજરાતમાં મધુપ્રમેહ એટલે કે ડાયાબિટીસથી પીડિત લોકોની સંખ્યા ચિંતાજનક હદે વધી રહી છે. ડાયાબિટીસ અંગે ઘણી ગેરસમજો પ્રવર્તી રહી છે. મોટાભાગના લોકોનું માનવું છે કે આ એક આનુવંશિક બીમારી છે. ઘરમાં માતા-પિતા હોય, એટલે તેમનાં સંતાનોને પણ આવી જ શકે તો સામે છેડે માતા-પિતાને ન હોય, એટલે આપણને ડાયાબિટીસ કદી થાય નહીં, એવું માનનારો વર્ગ પણ મોટો છે. જોકે આ બીમારી વારસાગતને બદલે ખોટી લાઈફસ્ટાઈલ, સ્ટ્રેસ અને ખાણીપીણીની ખોટી આદતોને લીધે થવાના કિસ્સા વધારે જોવા મળી રહ્યા છે.