સતત ત્રીજી વાર સૌરાષ્ટ્રમાં મહત્ત્વનું ત્રીજું પરિબળ

૨૦૧૨માં કેશુભાઈ પટેલ લેઉવા પટેલના મતો માટે જીપીપી લઈને આવ્યા, પણ મોદી ફાવ્યા; ૨૦૧૭માં અનામત આંદોલનના પડઘા પડ્યા અને કોંગ્રેસ પક્ષ ફાવી ગયો; હવે ૨૦૨૨માં સુરતના કનેક્શન સાથે સૌરાષ્ટ્રના ત્રણ નેતાઓ મેદાનમાં આવ્યા છે, ત્યારે ફરી એક વાર સૌરાષ્ટ્ર ત્રીજું પરિબળ બની શકે છે.

- દિલીપ ગોહિલ

સૌરાષ્ટ્ર અને કચ્છ - વિશેષ કરીને સૌરાષ્ટ્ર ફરી એક વાર ૨૦૨૨ની બૅટલમાં અગત્યની ભૂમિકા ભજવશે તેવું સૌ માને છે. એવું માનવા માટેનાં કારણો પણ છે, કેમ કે ત્રીજી વાર આ પ્રદેશમાં ત્રીજું પરિબળ અગત્યનું બની રહ્યું છે. ૨૦૧૨ અને ૨૦૧૭માં સૌરાષ્ટ્રનાં પરિણામો અગત્યનાં રહ્યાં અને એ જ રીતે ૨૦૨૨માં અહીં શું પરિણામો આવે છે તે નિર્ણાયક સાબિત થવાના છે.

૨૦૧૨માં કેશુભાઈ પટેલની જીપીપી (ગુજરાત પરિવર્તન પાર્ટી) મેદાનમાં ઊતરી હતી. જોકે કેશુભાઈ ગાજ્યા એટલા વરસ્યા નહીં અને માત્ર બે બેઠકો લીધી. કેશુભાઈ પોતે વિસાવદરથી જીત્યા અને ધારીમાંથી કોટડિયા જીત્યા. ભાજપના મતો વહેંચી નાખશે, તેની ધારણાથી વિરુદ્ધ ઓબીસીના મતો પણ કેશુબાપાએ ભાજપને અપાવ્યા અને ભાજપને જ ફાયદો થઈ ગયો હતો.

૨૦૧૨માં ગુજરાત વિધાનસભા બેઠકોનું સીમાંકન અમલી બન્યું હતું અને સૌરાષ્ટ્રની ચાર બેઠકો ઘટી હતી - ૫૨માંથી ઘટીને ૪૮. તેમાંથી ભાજપને (કચ્છ સહિતની) ૩૮ બેઠકો મળી હતી અને કેશુભાઈને કારણે કોઈ જ ફાયદો કોંગ્રેસને થયો નહોતો. સીમાંકનમાં ૪૦ ગ્રામીણ બેઠકોમાં ફેરફાર થયો અને તેનું નવું સ્વરૂપ શહેરી બન્યું. એ રીતે શહેરી બેઠકો પણ વધી અને કોંગ્રેસને તેનું પણ નુકસાન થયું.

હવે સૌરાષ્ટ્ર અને કચ્છની ૫૪ બેઠકો ગણવામાં આવે છે (ધંધુકા જિલ્લાવાર અમદાવાદમાં હોવાથી મધ્ય ગુજરાતમાં ગણવામાં આવે છે, પરંતુ લોકસભા પ્રમાણે સુરેન્દ્રનગરમાં સમાવેશ થતો હોવાથી સૌરાષ્ટ્ર સાથે તેને ગણીને ૪૯ બેઠકો ગણી શકાય. ૪૯ સૌરાષ્ટ્ર અને ૬ કચ્છ, કુલ ૫૫ બેઠકો ગણી શકાય.)

૨૦૧૨માં કેશુભાઈના લેઉવા પટેલ પાવરની અસર ના થઈ, પરંતુ ૨૦૧૭માં પટેલ અનામત આંદોલનની અસર સૌરાષ્ટ્રમાં થઈ તેવું સાર્વજનિક તારણ કાઢવામાં આવ્યું. ૨૦૧૭માં પણ આંદોલનના પ્રતિસાદમાં ઓબીસીના મતોનું ધ્રુવીકરણ નકારી ના શકાય, પરંતુ યુવા મતદારોનું સ્ટ્રેટેજિક વોટિંગ અને લગભગ અઢી ટકા મતો શિફ્ટ થયા તેનો ફાયદો કોંગ્રેસને થયો. કોંગ્રેસની (૬૧થી ૭૭ એમ) ૧૬ બેઠકો વધી તેમાંથી ૧૫ બેઠકોનો ફાયદો સૌરાષ્ટ્ર-કચ્છમાં થયો હતો. અમરેલી જિલ્લાની બધી જ બેઠકો કોંગ્રેસને મળી અને પરેશ ધાનાણી જેવા યુવા વિપક્ષના નેતા અને અંબરીષ ડેર જેવા આશાસ્પદ ધારાસભ્યો પક્ષને મળ્યા.