કદી વિચાર્યું નહોતું કે લોકો મને ‘ભામાશા' જેવા નામથી બોલાવશે

‘ખજૂરભાઈ’ તરીકે લોકપ્રિય નીતિન જાની મૅનેજમૅન્ટનો અભ્યાસ કર્યા બાદ કલાકાર બન્યા, પણ ‘અંતરનાદ’ સાંભળીને તેમણે પહેલાં અભિનય અને પછી સમાજસેવાને જીવનમંત્ર બનાવી લીધો.

- જિજ્ઞાસા સોલંકી

મારો જન્મ ૨૪ મે, ૧૯૮૬માં સુરતના વરાછા વિસ્તારમાં થયો હતો. કમલ પાર્કમાં અમે ચાર ભાઈઓ અને ત્રણ બહેનો મોટાં થયાં. પ્રાથમિક શિક્ષણ સંસ્કાર વિધાભવનમાં પૂરું કર્યું. જોકે મૂળ વતન અમારું ભાવનગર જિલ્લાનું ભાણવડ ગામ. બાળપણમાં હું ખૂબ તોફાની હતો. બારમા ધોરણમાં અમે બારડોલીના અસ્તાનમાં સ્થાયી થયા. ત્યાંની બીએબીએસ સ્કૂલમાં ૧૨મું ધોરણ પૂરું કરી માલીબા કોલેજમાં ગ્રેજ્યુએશન પૂરું કર્યું. ત્યાર બાદ લોનાવલા, પૂનાની સિંહગઢ કોલેજમાં એમબીએ અને એલએલબી કર્યું. ત્યાં કોલેજની સામે જ ‘બિગ બોસ'નો સેટ હતો. ત્યારે ‘બિગ બોસ' સિઝનનો લોકોમાં ભારે ક્રેઝ હતો. સેટ પર કામ કરતાં લોકોને હું કલાકો સુધી જોતો રહેતો. મને હંમેશાં થતું કે આ કામ કરવા જેવું છે, પરંતુ ત્યાં જવા માટે કેવો સંઘર્ષ કરવો પડે એનાથી હું વાકેફ હતો. અભ્યાસ પૂર્ણ કર્યા બાદ પૂનામાં જ ઇન્ફોસિસમાં ૭૦ હજારના પગારની નોકરી મળી ગઈ. એક વર્ષ આઈટી સેક્ટરમાં મેં નોકરી કરી, પરંતુ કેમેય કરી કામમાં મન ન લાગ્યું. આથી એક દિવસ સવારે ઊઠીને નક્કી કરી લીધું કે હવે મારે નોકરી નથી કરવી અને બોલિવૂડ ઇન્ડસ્ટ્રીમાં કામ કરવું છે. પિતાએ કહ્યું કે જો, તું આ નોકરીમાં ખુશ નથી રહી શકતો તો જેમાં ખુશ રહી શકે એવું કામ કર. મેં ‘બિગ બોસ’માં જ પ્રોડક્શન મેનેજર તરીકે ૧૭ હજાર પગારની નોકરી મેળવી લીધી. મારા મિત્રો મને કહેતા કે તું ગાંડો થઈ ગયો છે? ૭૦ હજારની નોકરી છોડીને હવે આ ૧૭ હજારની નોકરી કરશે? પરંતુ મને એ કામમાં મજા આવતી હતી. હાલ અમે લેક સિટી બાબેનમાં રહીએ છીએ.

‘બિગ બોસ'ની આઠ સિઝનમાં કામ કર્યું, ઝલક દીખલા જા, યે મોહબ્બતેં, યે રિશ્તા ક્યા કહેલાતા હૈ, તારક મહેતા કા ઉલ્ટા ચશ્મા, ધ કપિલ શર્મા શો, કૌન બનેગા કરોડપતિ વગેરે જાણીતા શોમાં પ્રોડક્શન મેનેજર તરીકે બાર વર્ષ કામ કર્યું. ૨૦૧૨થી એક્ટિંગ ક્ષેત્રે પ્રવેશ કર્યો. જાની બ્રધર્સ નામની ફિલ્મ પ્રોડક્શન કંપની શરૂ કરી. ૨૦૧૫-૧૬માં ‘આવું જ રહેશે' નામની ગુજરાતી ફિલ્મ બનાવી. જેનું સ્ક્રિપ્ટ રાઇટિંગ અને ડિરેક્શન પણ મેં જ કર્યું. ફિલ્મના પ્રમોશન માટે એક મેલ અને ફીમેલ કેરેક્ટરને લઈને કોમેડી વીડિયો બનાવવાનો વિચાર આવ્યો.