અભિનેત્રી વૈશાલી ઠક્કરની આત્મહત્યાનો કોયડો

વૈશાલીનાં લગ્ન કેલિફોર્નિયાના સોફટવેર એન્જિનિયર મિતેશ સાથે થવાના હતા. બંનેએ એ માટે કાયદાકીય પ્રક્રિયા પણ શરૂ કરી દીધી હતી. લગ્નની નોંધણી માટે ૨૦ સપ્ટેમ્બરે ઇન્દોરની જિલ્લા કલેક્ટર કચેરીમાં મિતેશ સુરેન્દ્ર કુમાર ગોર અને વૈશાલી હરભગવાન ઠક્કરની અરજી મૅરેજ ઍક્ટ હેઠળ મળી હતી

- ઇમરાન દલ

ઘરના આંગણે લગ્નની શરણાઈઓ વાગવાને માત્ર પાંચ દિવસની વાર હતી. મમ્મી-પપ્પા અને ભાઈનાં હૈયાં આનંદથી છલોછલ હતાં. દિવાળીના તહેવારો પણ હાથવેંતમાં હોવાથી ખુશીઓ પણ બમણી થવાની હતી, પણ વિધાતાને જાણે ઠક્કર પરિવારની આ ખુશી મંજૂર નહોતી. હજી જુલાઈ મહિનામાં જ તેણે થાઈલેન્ડમાં જન્મદિવસની મનભરીને ઉજવણી કરી, પણ તેના ખુશિમજાજ મુખડા પાછળથી વેદના ડોકિયાં કરતી હતી. શી હતી એ પીડા? શાં હતાં એનાં કારણો? તેણે બધું જ જાહેર કર્યું, પણ ત્યાં સુધીમાં તો એ જતી રહી હતી હંમેશને માટે!

આ વાત છે ‘યહ રિશ્તા ક્યા કેહલાતા હૈ’ અને ‘સસુરાલ સિમર કા’ જેવી ટીવી સિરિયલથી દર્શકોના દિલમાં સ્થાન મેળવી ચૂકેલી લોકપ્રિય અભિનેત્રી વૈશાલી ઠક્કરની. તેણે ૧૫મી ઑક્ટોબરે રાતે ઇન્દોર શહેરની સાંઈ બાગ કોલોનીમાં આવેલા પોતાના ઘરે ગળેફાંસો ખાઈને જિંદગી ટૂંકાવી. ૩૦ વર્ષની કુમળી વયે અપાર ચાહના મેળવી લેનાર વૈશાલીના જવાથી ટેલિવિઝન ઇન્ડસ્ટ્રીમાં ભારે આઘાત જન્મ્યો. તેના ચાહકો પણ હજી સુધી શોકમાંથી બહાર આવ્યા નથી.