શિયાળો આ વર્ષે કંઈક અલગ છે!

ડિસેમ્બરમાં પાર્ક સ્ટ્રીટની રોનક જોવા જેવી હોય છે. પાર્ટીઓ ચાલતી હોય છે, ફેસ્ટિવલ થાય છે. બંને તરફના રેસ્ટોરેન્ટમાં સંગીત ગુંજતું રહે છે, ચિત્ર નવું છે પણ ઇમારતો જૂની છે

- મુકેશ ઠક્કર

ઠંડી ધાર્યા કરતાં વહેલી આવી, પારો સતત નમતો જાય છે. સિઝનમાં કૉલકાતા મેદાનમાં ક્રિકેટની રમત સળંગ જોવા મળતી, પણ કતારના રંગે કૉલકાતા ફૂટબૉલમાં મસ્ત બની ગયું છે. ચોતરફ ફૂટબૉલની જ ચર્ચા ચાલે છે. અદલબદલની મોસમમાં અચાનક પરિવર્તનની ચમક દેખાય છે. ચર્ચા ચાલે છે કે ડિસેમ્બરમાં અસર વધુ દેખાશે.

બોટનિકલ ગાર્ડનમાં પિકનિકનું વાતાવરણ છે. ઇડન ગાર્ડનમાં લિજેન્ડ મહિલા ક્રિકેટર જુલન ગોસ્વામીની બાયોપિક પર બનતી ફિલ્મ ‘ચકદા એક્સપ્રેસ’ માટે જુલનનું પાત્ર ભજવતી અનુષ્કા શર્માએ પ્રેક્ટિસ કરી!

પશ્ચિમ બંગાળ સરકાર કૉલકાતાના ઉપનગર કોન્નનગરના દ્વાદશ શિવ મંદિરના ગંગા ઘાટ પર દરરોજ કાશીની જેમ ગંગા આરતી થાય તેની વ્યવસ્થા કરી રહી છે! બધા ગંગા ઘાટ સ્વચ્છ રાખવાનો નિર્દેશ આપવામાં આવ્યો છે. મકરસંક્રાંતિ પહેલાં નવું ચિત્ર ઊપસાવવાની પહેલ છે. ગંગાસાગરના સ્નાન માટે આખા દેશના યાત્રાળુઓ અહીં આવે છે.