રિપ્લેસમેન્ટની રામાયણ

પિટિશનમાં અમેરિકન સ્પોન્સરે પોતાના વિષે બધી વિગતો, એ જેના માટે પી-૩ વિઝાની પિટિશન દાખલ કરી રહ્યો છે એ કલાકારની બધી વિગતો, એ કલાકાર ક્યાં ક્યાં નાટક ભજવશે, કેટલું મહેનતાણું આપવામાં આવશે?

- ડો.સુધીર શાહ

‘મહેશ, તારી આગળ બી-૧/બી-૨ વિઝા છે ને?’

‘હા અરવિંદભાઈ, જાનકીને પરણ્યો ત્યારે એને હનીમૂન ડિઝનીવર્લ્ડમાં કરવાની ઇચ્છા હતી. આથી અમે અમેરિકાના વિઝિટર્સ વિઝાની અરજી કરી હતી. બધાએ કહ્યું હતું કે, અમે બંને ઍક્ટરો છીએ આથી વિઝિટર્સ વિઝા નહીં મળે, પણ અમારા નસીબ સારા હશે. ઇન્ટરવ્યૂમાં ઓફિસરે પૂછ્યું, ‘અમેરિકા શા માટે જવું છે?' જાનકીએ કહ્યું, ‘સર, ગયા અઠવાડિયે જ અમારાં લગ્ન થયાં છે. અમે ડિઝનીવર્લ્ડમાં હનીમૂન કરવા ઇચ્છીએ છીએ.’ ઓફિસરે ‘વેરીગુડ, ગો એન્ડ એન્જોય યોર હનીમૂન' એમ કહીને અમને દસ વર્ષના મલ્ટિએન્ટ્રી બી-૧બી-૨ વિઝા આપી દીધા. પણ અરવિંદભાઈ, મારી પાસે વિઝા છે એવો સવાલ શા માટે કર્યો?’

"જો મહેશ, ‘પપ્પા પાગલ પુષ્પા પાછળ’, આ નાટક ભજવવા અમે અમેરિકા જઈ રહ્યા છીએ. આખી ટીમના પી-૩ વિઝા મંજૂર થઈ ગયા છે, પણ હીરો આવી શકે એમ નથી. પંદર શૉ નક્કી છે. બીજા દસ આવે એમ છે. પબ્લિસિટી મોટા પ્રમાણમાં કરવામાં આવી છે. ટૂર કૅન્સલ કરીએ તો મોટી નુકસાની જાય. નામોશી પણ થાય.’

‘વાત તો સાચી છે અરવિંદભાઈ.’

‘હીરોની જગ્યા તું લઈ શકે એમ છે.’

‘પણ અરવિંદભાઈ, એ માટે પી-૩ વિઝા જોઈએ.’

‘મહેશ, છેલ્લી ઘડીએ હું તારા માટે કે બીજા કોઈ હીરો માટે પી-૩ વિઝા કેવી રીતે મેળવી શકું? તું બી-૧બી/૨ વિઝા ઉપર આવ અને હીરોની જગ્યાએ ગોઠવાઈ જા.' 

‘અરવિંદભાઈ, આ તો ઇલીગલ કહેવાય.’