પાક.ના નવા લશ્કરી વડાએ પોત પ્રકાશ્યું

મુનીર ૨૦૧૮ના પુલવામા ઍટેકના માસ્ટર માઇન્ડ છે એ ભારત જાણે છે. પુલવામાના હુમલાનો ભારતે કેવો જવાબ આપ્યો હતો એ પણ તેઓ જાણતા હશે

પાકિસ્તાનના નવા લશ્કરી વડા જનરલ આસિમ મુનીરે પોતાનું પદ ગ્રહણ કરતાની સાથે જ ભારતને જડબાતોડ જવાબ આપવાની વાત કરી છે. હોદ્દો સંભાળ્યા પછી તેમની સૌ પ્રથમ મુલાકાત પાકિસ્તાનના કબજામાં રહેલા કાશ્મીરની હતી અને ત્યાં તેમણે એવું કહ્યું કે, જો તેમના દેશ પર હુમલો થશે તો પાકિસ્તાની સેના તેની જમીનની એકેએક ઇંચનું રક્ષણ કરશે. એટલું જ નહીં તો સેના યુદ્ધ માટે પણ તૈયાર છે.

તાજેતરમાં ભારતના સંરક્ષણ પ્રધાન રાજનાથસિંહે એવું કહ્યું હતું કે, ગિલગિટ અને બાલ્ટિસ્તાન ભારતના ભાગ છે. એ જ રીતે, આર્મી કમાન્ડર લેફ. જનરલ ભૂપેન્દ્ર દ્વિવેદીએ પણ તાજેતરમાં એવું નિવેદન કર્યું હતું કે, પાકિસ્તાનના કબજામાં રહેલા કાશ્મીરને ભારતમાં ભેળવવા માટે સૈન્યને સરકારના આદેશનો ઇન્તેજાર છે.

ભારતના આવા નિવેદનોના જવાબમાં પાકિસ્તાનના લશ્કરી વડાએ આવી પ્રતિક્રિયા આપી છે. જનરલ મુનીરે ભારતને આપેલી ધમકી પાકિસ્તાનની આંતરિક સમસ્યાઓથી ત્યાંના લોકોનું ધ્યાન બીજે વાળવાના પ્રયાસરૂપ છે.