કેવી રીતે નિર્માણ પામ્યું વિશાળ પ્રમુખસ્વામી મહારાજનગર?

સ્વામિનારાયણ સંપ્રદાયના શ્રી પ્રમુખસ્વામી મહારાજના શતાબ્દી વર્ષની ઉજવણીના ભાગરૂપે અમદાવાદમાં એક ઐતિહાસિક કાર્યક્રમ યોજાઈ રહ્યો છે. અમદાવાદના એસ.પી. રિંગ રોડ પર ઓગણજ ગામ પાસે એક વિશાળ પ્રમુખસ્વામી મહારાજનગર ઊભું કરવામાં આવ્યું છે, જ્યાં એક મહિના સુધી આ મહોત્સવની ઉજવણી થશે. શું છે આ મહોત્સવની વિશેષતા આવો જાણીએ.

- આર્જવ પારેખ

અમદાવાદના સરદાર પટેલ રિંગ રોડ પર ઓગણજ સર્કલ પાસે જેવા તમે પહોંચો ત્યાં જ કલાત્મક પ્રવેશદ્વાર અને મૂર્તિ દશ્યમાન થાય છે અને પ્રમુખસ્વામી મહારાજનગરની ઝલક દેખાવા લાગે છે. અંદાજે ૬૦૦ એકર જેટલી વિશાળ જગ્યામાં જેનું નિર્માણ થયું છે એ પ્રમુખસ્વામી મહારાજનગરમાં પરમપૂજ્ય પ્રમુખસ્વામી મહારાજના શતાબ્દી વર્ષ મહોત્સવની ઉજવણીમાં લાખો લોકો ભાગ લેવા જઈ રહ્યાં છે. વધુમાં સંયુક્ત રાષ્ટ્રમાં પણ આ જન્મ શતાબ્દીની ઉજવણી થઈ હોવાથી સમગ્ર વિશ્વમાં પ્રમુખસ્વામી મહારાજનો વિશ્વશાંતિનો સંદેશ પહોંચ્યો છે. દેશવિદેશથી લાખો હરિભક્તો આ મહોત્સવમાં ભાગ લેવા માટે આવી પહોંચ્યા છે. અનેક આકર્ષણો અને વિવિધતાસભર કાર્યક્રમોથી ભરપૂર પ્રમુખસ્વામી મહારાજનગર કઈ રીતે તૈયાર થયું એ પણ જાણવા જેવું છે.

આમ જોવા જઈએ તો દાયકાઓ પહેલાં જ આ ઉજવણીના મૂળ રોપાઈ ચૂક્યા હતા. ૧૯૮૧માં પ્રમુખસ્વામી મહારાજે ભગવાન સ્વામિનારાયણ મહોત્સવ નગર બનાવ્યું હતું અને ૫૯ દિવસ જેટલો લાંબો અને ભવ્ય કાર્યક્રમ યોજ્યો હતો. આ જ કોન્સેપ્ટ પર આધારિત પ્રમુખસ્વામી મહારાજના શતાબ્દી મહોત્સવની ઉજવણીની તૈયારીઓ આજથી સાત વર્ષ પહેલાં જ શરૂ કરી દેવાઈ હતી.

પહેલાં આ મહોત્સવ ગત વર્ષે ડિસેમ્બરમાં જ યોજાવાનો હતો, પરંતુ કોરોનાની મહામારીને કારણે આ ઉજવણી શક્ય બની ન હતી. ગુજરાતમાં લગભગ બધા જિલ્લાઓમાં વત્તે-ઓછે અંશે છેલ્લાં સાત વર્ષથી અનેક કાર્યક્રમો થઈ રહ્યા છે જે આમ જોવા જઈએ તો આ મહોત્સવની ઉજવણીનો જ ભાગ હતો. વિદેશોમાં પણ ઘણા કાર્યક્રમો થયા છે. મહોત્સવની પૂર્વતૈયારી રૂપે બીએપીએસ સંસ્થા દ્વારા એક પારિવારિક અભિયાન હાથ ધરવામાં આવ્યું હતું, જેમાં સિત્તેર હજારથી વધુ કાર્યકરોએ ૨૪ લાખ પરિવારોનો સંપર્ક કર્યો હતો અને તેમના ઘરે ગયા હતા. ઉપરાંત બાળકો દ્વારા વ્યસનમુક્તિ અભિયાન પણ હાથ ધરવામાં આવ્યું હતું. આ સિવાય પ્રમુખસ્વામી મહારાજને અંજિલ આપવા માટે રક્તદાન, વૃક્ષોનું વાવેતર, અનેક શૈક્ષણિક પ્રવૃત્તિઓ હાથ ધરવામાં આવી હતી.