નવી સદીનું નવું યુદ્ધઃ સેમિકન્ડક્ટર વોર

અમેરિકા હવે નથી ઇચ્છતું કે એમના દેશના સંશોધકોએ ઇજાદ કરેલી અધતન સેમિકન્ડક્ટર ચિપ બનાવવાની ટેક્નોલોજી કોઈ પણ રીતે ચીન સુધી પહોંચે ભારત દેખીતી રીતે ચીનના વિકલ્પ તરીકે ઊભરી રહ્યું છે અથવા અન્ય દેશો ભારતને એ રીતે જોઈ રહ્યા છે, હાલ ભારત આખી સપ્લાય ચેઇનમાં મેન્યુફેક્ચરરની ભૂમિકા સ્વીકારવા તૈયાર છે

- સ્પર્શ હાર્દિક

રશિયા અને અમેરિકા વચ્ચે લાંબો સમય કૉલ્ડ વૉર ચાલી હતી. અડધી સદી પહેલાંના એ વિશ્વમાં આમનેસામને લડાતા યુદ્ધથી હટીને આ રીતે ‘ઠંડા’ પરંતુ કારમો ઘા કરતા યુદ્ધનું સ્વરૂપ કદાચ પહેલીવાર વ્યાપક રીતે સૌએ જોયું હતું. હવે આ એકવીસમી સદીમાં દુનિયાએ યુદ્ધના નવા પ્રકારોનાં દર્શન કર્યાં છે. આયાત-નિકાસને નિયંત્રણમાં રાખી, વિદેશી ચીજો પર વેરાઓ વધારી વિરોધી દેશોની આર્થિક રીતે કમર ભાંગી નાખતા ટ્રેડ વૉરમાં ચીન અને અમેરિકા ખાસ્સું લડ્યા. સોશિયલ મીડિયા પર ‘નેરેટિવ’ એટલે કે પોતાની સાચી કે ખોટી વાર્તા ચગાવીને વિશ્વના મનુષ્યોના મનમાં જે-તે દેશની સારી કે ખરાબ ઇમેજ ઊભી કરવાની વૉર પણ સતત ચાલી રહી છે. ડિપ્લૉમેટિક રીતે પોતાના દેશની વાત વિશ્વમંચ પર બુલંદ અવાજે અને આત્મવિશ્વાસથી રજૂ કરીને દેશની શક્તિની ઝાંખી કરાવતા યુદ્ધમાં પ્રભાવશાળી પ્રદર્શન કરી રહેલા ભારતના કુશળ વિદેશમંત્રી એસ. જયશંકરે દેશવાસીઓની ચાહના અને સરાહના પ્રાપ્ત કરી છે.

નવા જમાનાના નવા યુદ્ધોમાં વધુ એક નામ ઉમેરાય છે - સેમિકન્ડક્ટર વૉ૨. જેણે આપણી જિંદગી બદલી નાખી છે એવા આજનાં તમામ ડિજિટલ સાધનોમાં પાયાનો ઘટક હોય છે ઇન્ટિગ્રેટેડ સર્કિટ, ડાયોડ, ટ્રાન્ઝિસ્ટર જેવા જાતભાતના સોલિડ સ્ટેટ નામે ઓળખાતાં અત્યંત નાનકડાં ઉપકરણો કે ચિપ. આજે આપણા રોજિંદા કાર્યોમાં વપરાતાં સામાન્યમાં સામાન્ય ડિજિટલ સાધનોથી લઈને દેશની રક્ષામાં કાર્યરત ડિફેન્સ ટૅક્નોલૉજીનાં સાધનોમાં આ સોલિડ સ્ટેટ સામગ્રીઓ જ્યારે અગત્યનો ભાગ બની ચૂકી છે, ત્યારે એની ડિમાન્ડ પણ દેખીતી વાત છે કે વધે જ અને સપ્લાય કરનાર દેશ, કંપની કે માણસોની તાકાત પણ એ પ્રમાણે વિશાળ થાય.