વાત ‘અખંડા’ની..

માથા ઉપર ત્રિપુંડ, ગળા અને કાંડા પર રુદ્રાક્ષ, હાથમાં ત્રિશૂળ અને ભગવાન શિવનું બૅકગ્રાઉન્ડ મ્યુઝિક: તેલુગુ હિટ ફિલ્મ ‘અખંડા'નો આ દૃશ્યાત્મક અનુભવ હવે હિન્દીમાં પણ ૨૦મી જાન્યુઆરીએ જોવા મળશે. દક્ષિણ ભારતમા સફળ થયા બાદ હિન્દીમાં રિલીઝ થઈ રહેલી ‘અખંડા’ વિશેની રસપ્રદ વાતો અહીં કરી છે.

- પાર્થ દવે

લગભગ વર્ષ પહેલાં – ૨૦૨૧ની બીજી ડિસેમ્બરે તેલુગુ ફિલ્મ ‘અખંડા’ રિલીઝ થઈ હતી. બોયાપતિ શ્રીનૂ દ્વારા લિખિત અને દિગ્દર્શિત ‘અખંડા’માં નંદમુરી બાલકૃષ્ણ મુખ્ય પાત્ર ભજવે છે. નંદમુરી બાલકૃષ્ણ એટલે આરઆરઆરમાં ભીમ બનેલા અભિનેતા જુનિયર એનટીઆરના કાકા!

‘અખંડા' ફિલ્મે બોક્સ ઓફિસ ઉપર ૧૨૦.૮ કરોડની કમાણી કરી હતી. ૨૦૨૧ની સૌથી વધુ કમાણી કરનારી બીજી ફિલ્મ તથા નંદમુરી બાલકૃષ્ણના કરિયરની સૌથી વધુ કમાણી કરનારી ફિલ્મ ‘ અખંડા’ સાબિત થઈ. બાલકૃષ્ણ અને બોયપતિ શ્રીનૂએ અગાઉ ‘લેજન્ડ’ અને ‘સિમ્હા’ નામક બે ફિલ્મો કરી હતી. આ ત્રીજું કોલબરેશન હતું. ‘અખંડા’ ફિલ્મનું પ્રિમિયર ગયા વર્ષે જ ડિજિટલ પ્લેટફોર્મ પર કરવામાં આવ્યું હતું.