ભાવતાં ભોજનિયાં પળવારમાં હાજર

ઘરની રસોઈ ખાઈને કંટાળી ગયેલા લોકોએ કંઈક ચટાકેદાર સ્વાદ માણવા માટે અગાઉ હોટલ કે રેસ્ટોરન્ટ સુધી લાંબા થવું પડતું, પણ હવે જો માત્ર ખાવું હોય તો ઘરની બહાર પગ મૂકવાની જરૂર રહી નથી. છેલ્લા એકાદ દાયકાથી ઓનલાઇન ફૂડ ઑર્ડર કરીને મંગાવવાની પ્રથા એટલી સામાન્ય બની ગઈ છે કે ગણતરીની મિનિટોમાં મનગમતું ભોજન ઘરબેઠા હાજર થઈ જાય છે.

ખાદ્ય ઉદ્યોગ એ ઉત્પાદકો ઉપરાંત ગ્રાહકો, વેપારીઓ માટે સતત લાભદાયી ઉદ્યોગ રહ્યો છે. ઓનલાઇન ફૂડ ઑર્ડરિંગ સિસ્ટમ ગ્રાહકોને સરળતા આપે છે. આ માળખું હોટલો, રેસ્ટોરન્ટો અને કાફેના ખર્ચને ઘટાડીને વ્યવસાયનો વ્યાપ વધારવાની સવલત આપે છે. ગ્રાહકો ફ્રેમવર્ક દ્વારા આપવામાં આવેલી ફીડબેક સિસ્ટમ પર ખાદ્ય વસ્તુઓનું મૂલ્ય આંકી શકે છે. મંગાવેલા ખોરાકનું પડીકું હાથમાં આવે ત્યારે જ ચૂકવણી કરવાનો વિકલ્પ પણ ગ્રાહકને મળી રહેતો હોવાથી આ પદ્ધતિની વિશ્વસનીયતા વધી છે.