ભાજપ પ્રમુખ નડ્ડા માટે આગામી સમય પડકારજનક છે

જે.પી. નડ્ડાએ ભાજપનું પ્રમુખપદ સંભાળ્યું ત્યારથી અત્યાર સુધીમાં યોજાયેલી વિધાનસભાની ચૂંટણીઓમાં ૭૦ ટકાથી વધુ સફળતા સાથે નાનો ગ્રાફ ઘણો ઉપર ગયો છે

ભાજપના રાષ્ટ્રીય પ્રમુખ જે.પી. નડ્ડાને પક્ષના પ્રમુખ તરીકે જૂન ૨૦૨૪ સુધીનો વિસ્તાર મળી ગયો છે. ૨૦૨૩માં ૧૦ રાજ્યોમાં વિધાનસભાની ચૂંટણીમાં તેમ જ ૨૦૨૪ની લોકસભાની ચૂંટણીને લક્ષમાં રાખીને ભાજપે તેના પક્ષ પ્રમુખને બદલવાનું માંડી વાળીને વર્તમાન પ્રમુખને ચાલુ રાખવાનું વિચાર્યું છે. એ એક પ્રકારે સંગઠનાત્મક દ્રષ્ટિએ પરિપક્વ નિર્ણય ગણી શકાય.

નવા પ્રમુખની ચૂંટણીની પ્રક્રિયા વહેલી શરૂ કરાઈ અને લાંબો સમય ચાલે ત્યાં સુધી પક્ષમાં ચૂંટણીઝુંબેશ પણ ચાલતી રહે, એ સંગઠનની દ્રષ્ટિએ ધ્યાન વિકેન્દ્રિત કરવા જેવું બની રહે. ભાજપ માટે રાજ્ય વિધાનસભાઓની ચૂંટણી જીતવાનું પણ ઘણું મહત્ત્વનું છે. ૨૦૨૪ની ચૂંટણીનાં પરિણામોનો ઘણો બધો આધાર ૨૦૨૩માં નિર્માણ થવાનું છે. એ સ્થિતિમાં ભાજપ તેના પ્રમુખની ચૂંટણીની પ્રક્રિયામાં સમય અને શક્તિનો વ્યય કરવા ઇચ્છે નહીં, એ સ્વાભાવિક છે.

૨૦૨૩ અને ૨૦૨૪નાં વર્ષો ભાજપ માટે કસોટીના બની રહેવાના છે. વિરોધપક્ષો અત્યારથી ૨૦૨૪ની ચૂંટણી માટે સંગઠિત થવાના પ્રયાસ કરી રહ્યા છે. ૨૦૨૪માં સતત ત્રીજી લોકસભાની ચૂંટણીમાં પણ વિરોધપક્ષો સામે એકમાત્ર મોટો પડકાર નરેન્દ્ર મોદીનો હશે.