ઉત્તરાર્ધ મહોત્સવ હવે લોકપ્રિય બન્યો છે

ઉત્તરાર્ધ મહોત્સવના આ ત્રણ દાયકાઓ દરમિયાન લોકોમાં શાસ્ત્રીય નૃત્ય અને કલા પરત્વે લોકોમાં રસ અને રુચિ જાગૃત કરવામાં સફળતા મળી છે એવું સ્પષ્ટ જોઈ શકાયું છે. ગુજરાતનો આ સાંસ્કૃતિક મહોત્સવ મોઢેરાના સૂર્યમંદિરનાં શિલ્પોને કારણે અનોખો માહોલ રચે છે અને એ માહોલમાં નૃત્યોને નિહાળવાની મજા અનોખી હોય છે

ગુજરાતમાં કલા અને સંસ્કૃતિના ક્ષેત્રે નવા આયામ જોડવાના પ્રયાસરૂપે મહેસાણા જિલ્લાના મોઢેરા ખાતે આવેલા પ્રાચીન સૂર્યમંદિરનાં સ્થાપત્યોની વચ્ચે શાસ્ત્રીય નૃત્યનો ઉત્તરાર્ધ મહોત્સવ ઊજવવાનો છેલ્લા લગભગ ત્રણ દાયકાથી ઉપક્રમ ચાલે છે. આ વર્ષે પણ ઉત્તરાયણ પછી એ ઉત્સવ બે દિવસ ઊજવાઈ ગયો. ગુજરાતના અને ગુજરાતની બહારના શાસ્ત્રીય નૃત્ય ક્ષેત્રના દિગ્ગજ કલાકારોએ બે દિવસ દરમિયાન વિવિધ શાસ્ત્રીય નૃત્યની પ્રસ્તુતિ આપી. શરૂઆતનાં વર્ષો કરતાં હવેના આયોજનમાં ઘણા સુધારા-સુવિધાઓ ઉપલબ્ધ કરાવાઈ છે, તેમ જ આ મહોત્સવને લોકપ્રિય પણ બનાવાયો છે. તેને કારણે એક વિશેષ વાત એ જોવા મળી કે હવે આ મહોત્સવમાં ખૂબ મોટી સંખ્યામાં દર્શકો કાતિલ ઠંડી હોવા છતાં પણ રાત્રિના સમયે આવે છે અને છેક સુધી બેસીને વિવિધ કલાકારોની પ્રસ્તુતિને નિહાળે છે. પરિવાર સાથે આવતા લોકો બાળકોને પણ લાવે છે અને દર્શકો નૃત્ય પ્રસ્તુતિ વખતે કલાકારોનાં નામ સાથે તેની ચર્ચા કરતાં જોવાસાંભળવા મળે, એ પણ ગુજરાતમાં અનોખું આશ્ચર્ય ગણાવું જોઈએ. મતલબ કે, હવે ગુજરાતના દર્શકો માટે શાસ્ત્રીય નૃત્ય, તેના પ્રકારો અને કલાકારોનાં નામ હવે બહુ અજાણ્યા રહ્યા નથી.