ઇમિગ્રેશન માટે વર્ષ ૨૦૨૩ કેવું હશે?

ભારતીયોએ ખુશ થવા જેવી એક ખાસ વાત છે. જુદા જુદા પ્રકારો હેઠળ જે ઇમિગ્રન્ટ વિઝા મેળવી શકાય એ દરેકની ઉપર જે વાર્ષિક કોટા મર્યાદાની નિયત કરેલ સંખ્યા હોય એ કદાચ આ વર્ષમાં દૂર થશે

- ડો.સુધીર શાહ

મારી આવતીકાલ કેવી હશે? મારા કુટુંબનું, મારા દેશનું, વિશ્વનું આવતીકાલે શું થશે? આ બધાની કલ્પના કરવી ખૂબ જ મુશ્કેલ છે. આ પ્રમાણે જ અમેરિકાના ઇમિગ્રેશન માટે વર્ષ ૨૦૨૩ કેવું હશે એની ધારણા કરવી પણ ખૂબ જ મુશ્કેલ છે. અમેરિકાની સરકારની નીતિ, ત્યાંની આર્થિક સ્થિતિ અને વિશ્વના જુદા જુદા દેશમાં બનતા બનાવો, આ સર્વેની અમેરિકાના ઇમિગ્રેશન ઉપર અસર પડે છે.

અમેરિકા ઇમિગ્રન્ટોનો દેશ છે. કોલંબસે ઈ. સ. ૧૪૯૨માં આ દેશની ખોજ કરી ત્યારથી વિશ્વના લોકો અમેરિકા પ્રત્યે આકર્ષાયા છે. આ આકર્ષણ દિવસે દિવસે વધતું જ રહ્યું છે. આજે અમેરિકામાં પ્રવેશવા માટે ભારતીયો પડાપડી કરે છે. ત્યાંનું ગ્રીનકાર્ડ મેળવવા માટે વર્ષોની વાટ જુએ છે. ખરું ખોટું કરે છે. આઠ લાખ ડૉલરનું રોકાણ કરે છે. અનેકો તો એ તક અને છતના દેશમાં ઘૂસવા માટે લાખ્ખો રૂપિયા ખર્ચે છે અને જીવનું જોખમ ખેડે છે.