વેલેન્ટાઇન્સ ડેઃ પ્રેમ.. લાગણી અને સંબંધોનો અહેસાસ

નથી કોઈ શર્ત તારો પ્રેમ મેળવવાની, મને તું ચાહે એટલું જ બસ છે. લાગણીથી બંધાઈ છું તારી સાથે, તું ચાલે મારી સાથે એટલું જ બસ છે. પ્રેમ વિશે કહેનારા કહી ગયા, લખનારા લખી ગયા અને જીવનારા જીવી ગયા. છતાંય અઢી અક્ષરોની ગૂઢતા આજેય અકબંધ છે. પ્રેમ વ્યક્ત કરવાનાં સ્વરૂપ બદલાયાં છે, પરંતુ પ્રેમની અનુભૂતિ હંમેશાં એક જેવી જ રહે છે. માટે વૅલેન્ટાઇન ડે યુવાનોથી લઈ દરેક સંબંધ માટે ખાસ છે. ‘અભિયાને’ આવા જ કેટલાક ખાસ સંબંધો અને યુવાનોની લાગણી સમજવાનો પ્રયાસ કર્યો છે.

- હેતલ રાવ

‘સાંજે તૈયાર રહેજે, હું આજે ઑફિસેથી વહેલી ઘરે આવવાની છું,’ તૈયાર થતાં થતાં હેતવીએ ગર્વીને કહ્યું, ગર્વીની આંખોમાં ચમક આવી ગઈ અને બોલી, ‘કેમ, તું પણ વૅલેન્ટાઇન ડેની પાર્ટી આપવાની છું? અને સાચું કહેજે, કોણ છે તારો વૅલેન્ટાઇન અને મને સાથે લઈ જઈને તારે કબાબમાં હડ્ડી બનાવવી છે?’ ગર્વીની વાત સાંભળી હેતવી હસી પડી અને કહ્યું, ‘અહીં આવ,’ ગર્વીને પોતાની નજીક બોલાવી ગાલ પર મીઠી કિસ કરતાં બોલી, ‘તને ખબર છે, આ આખાય વિશ્વમાં મારું કોઈ વૅલેન્ટાઇન હોય તો તે તું છું. તારાથી પહેલાં પણ કોઈ નહીં અને પછીય કોઈ નહીં.’ ગર્લી હેતવીને ભેટી પડી. હેતવી એટલે ગર્વીની ફિયા (ફોઈ). ગર્લી હેતવીના મોટાભાઈની દીકરી હતી. ભાઈ-ભાભી બંને જોબ કરતાં અને હેતવી પછી ઘરમાં પ્રથમ બાળક ગર્વી હતી. માટે જ તે ઘરની ધડકન પણ હતી. જોકે ગર્વી બાળપણથી જ પોતાની ફિયાની ખૂબ નજીક હતી અને હેતવી માટે તો તેની દુનિયા જ ગર્વી હતી. ‘અભિયાન’ સાથે વાત કરતાં હેતવી કહે છે, ‘આજે તો ગર્વીનાં લગ્નને પણ બે વર્ષ થઈ ગયાં છે અને મારાં લગ્નને ૧૪ વર્ષ. અમારે બંનેને ખૂબ ઓછું મળવાનું થાય છે. ખાસ કરીને ફોન પર જ હાય, હેલો અને મેસેજની આપ-લે થતી હોય છે, કારણ કે ગર્વી હવે તેના બેટર હાફ સાથે ન્યૂઝીલેન્ડમાં રહે છે, પરંતુ આજે પણ અમારા વચ્ચે પ્રેમ અકબંધ છે.’