મૂલ્યવાન ધાતુ લિથિયમનો વિશાળ ભંડાર ભારતને આત્મનિર્ભર બનાવશે

લિથિયમ બેટરીના માર્કેટમાં ચીનનો દબદબો છે. તેના કુલ ઉત્પાદનમાં ૭૭ ટકા ચીનમાં ઉત્પાદન થાય છે. ભારત આવી બેટરીઓનું ઉત્પાદન કરીને ચીનના વર્ચસ્વને પડકાર ફેંકી શકે છે

જમ્મુ-કાશ્મીરનો રિયાસી જિલ્લો અત્યાર સુધી વૈષ્ણવદેવી મંદિર માટે ઓળખાતો હતો. આ જિલ્લાના સલાલ હેમાના વિસ્તારમાં વિશ્વનો બીજા નંબરનો સૌથી મોટો લિથિયમ ધાતુનો ભંડાર મળી આવ્યો છે. એ ભારત માટે કોઈ જેકપોટથી ઓછો મહત્ત્વનો નથી. ભારતીય ભૂસર્વેક્ષણ વિભાગના વિજ્ઞાનીઓએ ૫૯ લાખ ટન લિથિયમનો ભંડાર શોધીને રિયાસી જિલ્લાને આંતરરાષ્ટ્રીય સ્તરે નવી ઓળખ આપી છે. આ પહેલાં કર્ણાટકના મન્ત્યા જિલ્લામાં લિથિયમ ઓરનો ભંડાર મળ્યો હતો. ત્યાંના ૧૬૦૦ ટનના જથ્થાની સરખામણીમાં રિયાસીનો ભંડાર અનેક ગણો વિશાળ છે. આર્થિક વ્યૂહાત્મક તેમ જ પર્યાવરણની દૃષ્ટિએ મહત્ત્વપૂર્ણ એવા આ સંશોધનને કારણે ભારતના આત્મનિર્ભર બનવાની દિશામાં નવી શક્યતાઓના દરવાજા ખોલી આપ્યા છે.