માંડવીના તબીબે પોતાનો અનમોલ ખજાનો કચ્છ યુનિવર્સિટીને અર્પણ કર્યો

ગામડાના એક દર્દીએ ખેતરમાંથી મળેલું એક ઠીકરું ડૉ. પુલિન વસાને આપ્યું. તે જોઈને તેમને ખ્યાલ આવ્યો કે આ વસ્તુ આજના જમાનાની નથી. જાણકારો સાથે વાત કરતાં ખબર પડી કે એ તો હડપ્પન સમયના વાસણનો અવશેષ છે. ત્યારથી માંડવીના આ તબીબની પુરાતત્ત્વીય અવશેષો શોધવાની યાત્રા શરૂ થઈ. પછી તો ડૉ. વસાએ પંથકમાં ફરી ફરીને બહુમૂલ્ય પુરાતત્ત્વીય ખજાનો એકઠો કર્યો. આ ખજાનો તેમણે કચ્છ યુનિવર્સિટીને સોંપી દીધો છે. એ અંગે વધુ સંશોધન માટેનાં દ્વાર ખૂલ્યાં છે.

- સુચિતા બોઘાણી કનર

કચ્છનો પ્રદેશ ભૂતકાળમાં ધરતીના પેટાળમાં થયેલી ઊથલપાથલનો સાક્ષી રહી ચૂક્યો છે. અહીંની ધરતીમાં માનવ જીવન પાંગર્યું તે પહેલાંના સજીવોના જીવાશ્મિઓ દટાયેલા છે, ડાયનોસોરથી માંડીને પાષાણયુગ, હડપ્પન, તે સમય પછીના વૈદિક સમયગાળાના અનેક પુરાવાઓ છે. જોકે આ અવશેષોનું જોઈએ તેટલું જતન થતું નથી, તેના વિશે વૈજ્ઞાનિક ઢબે બહુ ઓછો અભ્યાસ થયેલો છે. જો આ અવશેષોની સાચવણી નહીં કરાય, તેના વિશે અભ્યાસ નહીં કરાય તો ભાવિ પેઢી આ અમૂલ્ય વારસાથી વંચિત રહી જશે. ભૂકંપના ઝોન પાંચમાં આવતો આ પ્રદેશ કુદરતની યુગોની કરામતોને સાચવીને બેઠો છે. તેના વિશે વિશેષ અભ્યાસ થાય અને તેની જાળવણી થાય તે અતિ જરૂરી છે. કંઈક આવા જ હેતુથી પોતાની ૩૫-૪૦વર્ષની જહેમતથી એકઠો કરેલો પુરાતત્ત્વના અભ્યાસીઓ માટેનો બેશિકંમતી ખજાનો માંડવીના એક તબીબે કચ્છ યુનિવર્સિટીને સોંપ્યો છે.