આઓ તુમ્હેં ચાંદ પે લે જાયેં..

અવકાશ યાત્રા કર્યા વિના ધરતી પર રહીને ચંદ્ર પર પગ મૂકવાનો અનુભવ મેળવી શકાય એમ છે. અમદાવાદથી આશરે ૨૦૦૦ કિ.મી. દૂર લેહ-કારગિલ હાઈવે પર અને સમુદ્ર સપાટીથી ૧૧,૫૨૦ ફીટની ઊંચાઈ પર લદ્દાખમાં આવેલું ‘લામાયુરુ’ પૃથ્વી પરની ચંદ્રભૂમિ છે

- પ્રિયંકા જોષી

ધરતી પર વિચરણ કરનાર મનુષ્યના મનમાં હંમેશાં આકાશ માટેનું કુતૂહલ રહ્યું છે. આ કુતૂહલ માનવજાતની ઉત્પત્તિના સમયે જ જન્મ્યું હશે. સઘળી પ્રાચીન સભ્યતાઓના અવશેષોમાં તેના પુરાવા મળે છે. પૃથ્વીથી સૌથી નજીકનો ઉપગ્રહ ચંદ્ર સૌને પ્રિય છે. કવિઓ, સાહિત્યકારો, સંગીતકારો, ગીતકારો, ચિત્રકારોથી માંડીને વિજ્ઞાનીઓ સુધીનો એ લાડીલો છે. કોઈ તેમાં ઈશ્વરીય અમી ઝરતું અનુભવે છે, તો કોઈ વિરહી તેમાં પોતાના પ્રિયજનની છબિ શોધે છે. પ્રાચીન સમયમાં રહસ્યમય લાગતા ચંદ્ર વિશેના મહત્ત્વનાં તથ્યોથી આજે આપણે સૌ માહિતગાર છીએ છતાં આજે પણ ચંદ્ર સાથે જોડાયેલી લાગણીઓ કલ્પનાના સુખ પ્રદેશમાં ખેંચી જાય છે. આજે આપણે જાણીએ છીએ કે ચંદ્ર પર હવા નથી, પાણી નથી, સપાટી પર પગ ટકાવી રાખનાર ગુરુત્વાકર્ષણ પણ પૂરતા પ્રમાણમાં નથી. તો પણ કોઈ પ્રેમી હૃદય જ્યારે ચાંદ પર લઈ જવાના કે ચાંદને ધરતી પર ઉતારી લાવવાના વાયદા કરે છે ત્યારે ભૌગોલિક સત્યો વિસરી જવાનું મન થાય છે.

જોકે હવે ચાંદ પર જવાના વાયદા સાવ અશક્ય નથી. અવકાશ યાત્રા કર્યા વિના ધરતી પર રહીને ચંદ્ર પર પગ મૂકવાનો અનુભવ મેળવી શકાય એમ છે. અમદાવાદથી આશરે ૨૦૦૦ કિ.મી. દૂર લેહ-કારગિલ હાઈવે પર અને સમુદ્ર સપાટીથી ૧૧,૫૨૦ ફીટની ઊંચાઈ પર લદ્દાખમાં આવેલું ‘લામાયુરુ’ પૃથ્વી પરની ચંદ્રભૂમિ છે.

પૃથ્વી પરની ચંદ્રભૂમિ એટલે લદ્દાખમાં આવેલું ‘લામાયુરુ’