ડો. બાબાસાહેબ આંબેડકરના પૌત્ર પ્રકાશ આંબેડકરની ખાસ મુલાકાતશિવ શક્તિ અને ભીમ શક્તિ સાથે મળીને સત્તાધારીનો સામનો કરે

૧૪મી એપ્રિલે ડૉ. બાબાસાહેબ આંબેડકરનો જન્મદિવસ સમગ્ર દેશમાં આંબેડકર જયંતી તરીકે ઉત્સાહપૂર્વક મનાવવામાં આવે છે. બૌદ્ધોની સાથે રાજકીય આગેવાનો અને ડૉ. આંબેડકરના વિચારોથી પ્રેરિત અન્ય સમાજ અને ધર્મના લોકો ડૉ. બાબાસાહેબ અને ગૌતમ બુદ્ધની પ્રતિમાઓને વંદન કરીને જયંતીના તમામ કાર્યક્રમોમાં ઉત્સાહપૂર્વક ભાગ લે છે. તેથી આંબેડકર જયંતી માત્ર દલિત વર્ગની નહિ, પરંતુ સમગ્ર રાષ્ટ્રમાં ડૉ.આંબેડકરના વિચારોથી પ્રેરિત અનેક દેશવાસીઓની છે. આ જન્મજયંતી નિમિત્તે ડૉ. બાબાસાહેબ આંબેડકરના પૌત્ર ઍડવોકેટ પ્રકાશ આંબેડકર સાથે ‘અભિયાને’ મુલાકાત કરી. મુંબઈના દાદરમાં ડૉ. બાબાસાહેબ આંબેડકરના નિવાસસ્થાન રાજગૃહ ખાતે તેમની સાથે થયેલી વાતચીત અહીં પ્રસ્તુત છે.

- લતિકા સુમન

‘૧૪ એપ્રિલે ડૉ. બાબાસાહેબ આંબેડકર જયંતી, આ દિવસ માત્ર દલિત વર્ગ જ નહીં, પરંતુ હવે સમગ્ર સમાજ ધામધૂમથી ઊજવતો જોવા મળે છે?’ ‘અભિયાન’ના આ સવાલથી જ્યારે વાતચીત શરૂ થઈ ત્યારે પ્રકાશ આંબેડકરે જવાબમાં કહ્યું, ‘સૌથી પહેલા તમારે એ વાત પર ધ્યાન આપવું જોઈએ કે, અહીંની સામાજિક વ્યવસ્થામાં મોટા પાયે પરિવર્તન થતું દેખાઈ રહ્યું છે. તેથી જ હું કહીશ કે વર્ષ ૨૦૧૦ પહેલાં સમાજમાં આ પરિવર્તન ખુદ સમાજ દ્વારા જ કરવામાં આવતું હતું. ધીમે-ધીમે તેઓ એકબીજા સાથે ભળી રહ્યા હતા. તે બદલાઈ રહ્યો હોય તેવું લાગતું હતું. એ માટે કોઈ દખલ કરી રહ્યું છે હું એવું નહીં કહું કે કોઈ તેમના પર લાદી રહ્યું છે એવું પણ હું નહીં કહું. સમાજના કેટલાક ઘટકો આપોઆપ જોડાઈ રહ્યા છે. મેં જોયું કે ગોધરાકાંડ પછી લોકો ખૂબ જ ઉત્સાહથી જયંતી મનાવવા લાગ્યા છે. અગાઉ તેઓ ઉજવણી નહોતા કરતા એવું નથી, પરંતુ મૂક થઈને ભાગ લેતા. પછી એ જ લોકો બાબાસાહેબને ખુલ્લેઆમ સ્વીકારવા લાગ્યા અને એની અભિવ્યક્તિ કરવાની સાથે સ્વયંને સામેલ કરવા લાગ્યા.'