વાત જીવનથી છલકાતાં બાળકો અને ફ્રિડમ રાઇટર્સની..

પોતાની આંતરિક શક્તિ, શુભ ભાવનાથી જેમની સાથે લોહીનો પણ સંબંધ નથી એવા વિધાર્થીઓના જીવનમાં સકારાત્મકતાની સુવાસ ફેલાવનાર શિક્ષક કદી સાધારણ નથી હોતા!

- સ્પર્શ હાર્દિક

ગુરુ અને ગોવિંદ/ઈશ્વર વચ્ચે પ્રાથમિકતા આપવાની થાય તો ગુરુને પ્રથમ પ્રણામ કરવાનું પસંદ કરશે એવું એક દોહામાં સંત કબીરજી કહી ગયા એને વર્ષોનાં વહાણાં વહ્યા પછી ગુરુની વિશાળ ભૂમિકાનો એક હિસ્સો આપણા સમાજમાં શિક્ષકે સંભાળી લીધો છે. શાળાના વાતાવરણ બહારના પણ અમુક પ્રકારના માર્ગદર્શક મનુષ્યોને લોકો પોતપોતાની રીતે ગુરુનો દરજ્જો આપી ધન્યતા અનુભવતાં રહે છે. આજનો શિક્ષક સમાજમાં જ જીવતો એક સામાન્ય મનુષ્ય હોવાથી તેની સ૨ખામણી અતીતમાં જીવી ગયેલા, સમાજની બહાર કે એનાથી શક્ય એટલું દૂર રહેનારા ગુરુઓ સાથે ક૨વી વાજબી ન ગણાય, તો પણ કેટલાયે કિસ્સામાં શિક્ષક અસાધારણ મનુષ્ય સાબિત થઈને દેખાડે છે. આવા બે કિસ્સાઓની વાત કરીએ.

જાપાનની એક પ્રાથમિક શાળાના શિક્ષક ટોશીરો કાનામોરી અસાધારણ શિક્ષક હતા, જેમના પર બનેલી ૨૦૦૩ની ડૉક્યુમેન્ટરી ‘ચિલ્ડ્રન ફુલ ઑફ ધી લાઇફ’ ઇન્ટરનેટ પર સારી એવી ખ્યાતિ પ્રાપ્ત કરી ચૂકી છે. માત્ર ચાલીસેક મિનિટની એ નીતાંત સુંદર કલાકૃતિ જ કહેવાય એવી ડૉક્યુમેન્ટરીમાં માનવમૂલ્યોની કદર કરનાર શુદ્ધ હૃદયના શિક્ષક કેવી સહજતાથી પોતાના વિદ્યાર્થીઓમાં ગુણોનું સિંચન કરે છે એ દર્શાવ્યું છે. ચોથા ધોરણના વર્ગ શિક્ષક ટોશીરો કાનામોરી દરેક વિદ્યાર્થી પાસે રોજનીશી જેવી નોટબુક લખાવડાવતા અને દરરોજ ત્રણ વિદ્યાર્થીઓ વર્ગમાં મોટેથી પોતાની નોટબુક વાંચી સંભળાવતાં. વિદ્યાર્થીઓના મનની પીડા, અકળામણ, આનંદ જેવી શુદ્ધ ભાવનાઓ એમના સરળ શબ્દોમાંથી મઘમઘતી.