હવામાનની આગાહી ખોટી જ પડવાની છે, હવામાન કેમ પલટાયું?

બંગાળના ઉપસાગરમાં લો પ્રેશર હોય તો જે-તે જગ્યાએ વાવાઝોડું આવશે. શિયાળામાં કાશ્મીરનું દાલ લેક ઠરી જાય તો બીજા વર્ષે વરસાદ સારો આવશે ધીરે ધીરે રાજસ્થાનમાં પણ વરસાદનો ઉત્તરોત્તર વધારો થતો ગયો. આજે બિકાનેર જેવા બોર્ડર પર આવેલા પ્રદેશોમાં ખૂબ જ સારા પ્રમાણમાં ખેતીવાડી થાય છે એવું લાગે છે કે હવે વિદેશની જેમ ભારતમાં પણ ચોમાસું એક ઋતુ નહીં રહે, પરંતુ સમગ્ર વર્ષ દરમિયાન વરસાદ પડતો રહેશે. ખેડૂતોએ ખેતી કરવાની પેટર્ન બદલવી પડશે

ઉનાળાની શરૂઆત થતાં પહેલાં એક પણ હવામાનશાસ્રી, હવામાનની જાણકારી આપતી સંસ્થા કે જ્યોતિષીઓએ આગાહી કરી ન હતી કે ઉનાળાની સિઝનમાં વારંવાર વરસાદ પડશે. આવું કેમ થાય છે? તે જાણવાનો પ્રયત્ન આપણે આ લેખ દ્વારા કરવાનો છે. આનો ખ્યાલ મને દસ વર્ષ પહેલાં આવ્યો હતો. તેથી મેં તેના પર અવલોકન લેવાના શરૂ કર્યા હતા. બે-ત્રણ વર્ષ બાદ તેનો અંદાજ આવવાનો શરૂ થઈ ગયો હતો. તે વખતે રેડિયો મિર્ચી ૫૨ ધ્વનિત સાથે વાતચીતમાં મેં તેનો ખ્યાલ આપી દીધો હતો. ત્યાર બાદ ઘણી બધી વખત આના પર લખવાનું વિચાર્યું, પરંતુ વ્યસ્તતાને કારણે આ કામ નથી થયું, પરંતુ છેલ્લા બે મહિના દરમિયાન સતત બેથી ત્રણ વખત ઉનાળામાં વાદળછાયું વાતાવરણ અને વરસાદ તેમ જ કરા પડવાની આગાહી કોઈ હવામાનશાસ્ત્રી કે જ્યોતિષશાસ્ત્રીઓએ કરી ન હતી. તેથી મનને સળવળાટ થયો અને લખવા બેસી ગયો.

સામાન્ય રીતે આ પરિસ્થિતિને માટે ગ્લોબલ વૉર્મિંગના પરિબળને જવાબદાર ઠેરવવામાં આવે છે, પરંતુ મારા સંશોધનમાં ગ્લોબલ વૉર્મિંગ સિવાયનાં પરિબળો પણ સામે આવ્યાં છે. જે અહીં પ્રસ્તુત છે.

ધરતીકંપ પછી ઘણા બધા જ્યોતિષીઓ અને હવામાનશાસ્ત્રીઓ માર્કેટમાં આવ્યા. અકસ્માતે તેઓએ કરેલી દસમાંથી પાંચ આગાહીઓ સાચી પણ પડી. પછી ધીરે ધીરે આગાહીઓ ખોટી પડવાનો દર વધતો ગયો. પરિસ્થિતિ હવે એ આવી ગઈ કે તેઓ પોતાની ઓળખ જ્યોતિષ તરીકે આપવી કે હવામાનશાસ્ત્રી તરીકે આપવી એની ચિંતામાં પડી ગયા છે. એક વખત ટેલિવિઝનની ડિબેટમાં મારી મુલાકાત એમની સાથે થઈ હતી. ત્યારે મેં મારા અવલોકનની વાત એમને કહી હતી. કારણ એ હતું કે આગાહી કરવાનું કામ મારું ન હતું, તેમનું હતું. આ ટુલ તેમને મળે તો કદાચ ભવિષ્યની આગાહીઓ કરવા માટે તેમને ઉપયોગી સાબિત થાય તે હેતુ હતો.