જૂના અમદાવાદની લોકજીભને દેન

અમદાવાદનો શહેર વિસ્તાર જ્યારે અમદાવાદનું હાર્ટ હતો ત્યારે કેટલાય શોખીન એવા હતા કે સવારે ઘરેથી ઑફિસ જતાં ત્રણ વાર બ્રેક લે ને ત્રણે વાર જુદી-જુદી જગ્યાએ નાસ્તો કરે

- ગૌરાંગ અમીન

આજકાલ બધે લગભગ બધું જ ખાવાનું મળતું થયું

પહેલાં ગુજરાતમાં અમદાવાદમાં જ ખાસ મળતું હતું

અમદાવાદ ઘણાં માટે રહેવાનું સ્થળ છે, ઘણાં માટે કામ કરવાનું સ્થળ છે. અમદાવાદમાં એગ્ઝિસ્ટ કરવું કે અમદાવાદમાં સર્વાઇવ કરવું એ બહુધા સરળ તેમ જ સામાન્ય ઘટના છે. ખરા યા મૂળ અમદાવાદી માટે અમદાવાદ જીવવાની જગ્યા છે. અમદાવાદમાં અમદાવાદી રીતે જીવંત રહેવું એ કળા છે કે કારીગરી છે એ ચર્ચા જવા દો, સમજવું હોય તો એ સમજો કે શ્વાસને ભીના કરતાં ધુમાડા, માનવીઓને ભેટવા સદા ઉત્તેજિત રેતી ’ને અદશ્ય વરાળથી વધુ તીક્ષ્ણ ગરમીમાં જીવતું અમદાવાદ પોતાના અમદાવાદીને જીવતા રહેવા ખવડાવે છે ’ને ખાતા રહેવા માટે જીવાડે છે. જીવવા જીવવામાં ફરક છે તેમ ખાવા ખાવામાં ફરક છે એ જાણકારી જૂની થઈ. અમદાવાદ કહે છે કે, અહીં એક ભૂખ ’ને બીજી કે બાવીસમી ભૂખ વચ્ચે ટિલ અંતર પડી શકે છે. ખુદના ફૂડ-મૅનેજમૅન્ટ માટે જેટલા ડાયેટિશિયન, ન્યુટ્રિશનિસ્ટ ને ઓળખીતા જન મળો એટલી નવી ટિપ્સ મળે. જેટલા અમદાવાદીને મળો એટલી સ્વાદ માટેની નવી ટિપ મળે. એમાં જૂના અમદાવાદની વાત અનેરી.

૨૦૨૩ ચાલે છે. આજના અમદાવાદમાં મેં બધી જ વેરાયટી ખાધી છે કે બધાં જ ફૂડ આઉટલેટ પર મેં ખાધું છે એવું કહેનારાને અનુભવીઓ લાયર માને એમાં કોઈ નવાઈ નથી. ના, અત્રે આપણે અમદાવાદમાં આજે ક્યાં શું મસ્ત ખાવાનું મળે છે એ ખજાનો ખોલવાનું સાહસ નથી કરતાં. ગુજરાત બદલાઈ ગયું છે એ ઉક્તિ નિયમિત અંતરાલે તાજી કરવી પડે એવી સ્થિતિ છે ત્યારે આજની યંગ જનરેશન વા જનરેશન હજી જન્મી ના હતી ત્યારે અમદાવાદ શું પીરસતું હતું તેની ઊડતી જાણકારી લેવા જેવી છે. આઝાદીની લડાઈ હોય કે ભારતપા-કિસ્તાનની ક્રિકેટ મેચ હોય, અમદાવાદ ગુજરાતનું માત્ર સેન્ટર નથી રહ્યું, પરંતુ એપીસેન્ટર પણ રહ્યું છે. તેમ છતાં અમદાવાદે ક્યારેય એવું કહેવાની જરૂર નથી પડી કે હું ગુજરાતનું દિલ્હી છું અથવા હું મિની-મુંબઈ છું. કેમ કે અમદાવાદ અમદાવાદ જ રહ્યું છે. અમદાવાદમાં એટિટ્યૂડ ’ને અ લા કાર્તા પોતાની રીતે ચાલ્યા હતા ’ને પ્રેમથી જેને જોડાઈ જવું હોય તેને પોતાની સાથે જોડતા હતા.